Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 141 Hüküm no: 166 Orijinal metin no: [95-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Avraham v. Kemal’in çocuklarının kendilerine intikal eden evdeki hisselerini mehir alacağı karşılığında anneleri Esterola’ya devrettikleri Havâss-ı Aliyye kazâsına tâbi‘ kasaba-i Hasköy mahallâtından Kiremitçi Ahmed Çelebi mahallesinde sâkin iken bundan akdem hâlik olan Avraham v. Kemal nâm Yahudinin verâseti zevce-i metrûkesi Esterola bt. İsak ile sulbî kebîr oğulları Kemal ve Salamon ve kebîre kızları Harsi ve Rine nâm Yahudiyelere münhasıra olduğu şer‘an zâhir ve müte‘ayyin oldukdan sonra mezbûrûn Kemal ve Salamon ve Harsi ve Rine nâm Yahudiyeler meclis-i şer‘de işbu râfi‘atü’l-vesîka vâlideleri mezbûre Esterola muvâcehesinde her biri ikrâr ve takrîr-i kelâm edip mahalle-i mezbûrede vâki‘ bir tarafdan Mustafa Efendi b. Abdullah mülkü ve bir tarafdan İsak v. Yasef nâm Yahudi mülkü ve bir tarafdan David oğlu mülkü ve bir tarafdan ba‘zan Hana nâm zimmî mülkü ve ba‘zan tarîk-ı âm ile mahdûd üç bâb tahtânî oda ve bir hamam ve camekân ve altında bir kârgir mahzen ve bir cihannümâ ve bir matbah ve dört kenîf ve dört bi’r-i mâ’ ve zât-ı eşcâr-ı müsmire ve gayrı müsmire bahçeyi hâvî mülk menzil babamız hâlik-i mezbûrdan bi hasebi’l-irsi’ş-şer‘î bize intikāl ve isâbet etmeğin menzil-i mahdûd-ı mezkûru vâlidemiz mezbûre Esterola’ya üç bin kıt‘a esedî guruşa bey‘ ve teslîm ol dahi vech-i muharrer üzre iştirâ ve tesellüm ve kabûl eylediğinden sonra semeni olan meblağ-ı mezbûr üç bin esedî guruşu babamız hâlik-i mezbûrun zimmetinde mütekarrir ve ma‘kūdun aleyh olan yedi bin kıt‘a esedî guruş mehr-i müeccel mukābelesinde takas ol dahi mukāssa ve kabûl eylediğinden sonra menzil-i mahdûd-ı mezkûrda alâka ve medhalimiz kalmadı vâlidemiz mezbûre Esterola’nın mülk-i müşterâsıdır keyfe mâ yeşâ’ ve yahtâr mutasarrıfe olsun dediklerinde gıbbe’t-tasdîki’l-mu‘teber mezbûre Esterola meclis-i mezbûrda oğulları mezbûrân Kemal ve Salamon ve kızları mezbûretân Harsi ve Rine muvâcehelerinde ikrâr ve takrîr-i kelâm edip zevcim hâlik-i mezbûrun zimmetinde mütekarrir ve ma‘kūdun aleyh olan yedi bin esedî guruş mehr-i müeccelimin [96] üç bin esedî guruşunu menzil-i mahdûd-ı mezkûrun semenine takas edip mehr-i mezbûrdan bâkī dört bin esedî guruşundan mezbûrân Kemal ve Salamon ile mezbûretân Harsi ve Rine’nin zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde mukırra-i mezbûre Esterola’nın vech-i meşrûh üzre cârî ve sâdır olan ikrârını mezbûrûn Kemal ve Salamon ve Harsi ve Rine vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’s-sânî min Recebi’l-mürecceb li sene tis‘în ve elf. Şuhûdü’l-hâl: İbrahim Efendi b. Resul, Osman Efendi b. Ali, Mehmed Bey b. Ali, Abdülbâkī b. Ömer, Süleyman Çelebi b. Ramazan min huddâm