Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 150 Hüküm no: 181 Orijinal metin no: [104-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi İspolyot v. Yorgi’nin Ali b. Kanber’e verdiği kiremitleri veya bedelini talep ettiği ve ödemesinin tenbih edildiği Medîne-i Hazret-i Ebâ Eyyûb el-Ensârî müzâfâtından kasaba-i Hasköy mahallâtından Abdüsselâm mahallesi ahâlîsinden olup kiremitçi tâifesinden râfi‘ü’r-rakīm İspolyot v. Yorgi nâm zimmî mavnacı tâifesinden olup medîne-i mezbûre mahallâtından Câmi‘-i Kebîr mahallesinde sâkin Ali b. Kanber nâm kimesne mahzarında üzerine da‘vâ ve takrîr-i kelâm edip târih-i kitâbdan beş ay mukaddem mezbûr Ali yedine beylik nîme ta‘bîr olunur bin sekiz yüz tuğla def‘ ve teslîm ol dahi ahz ü kabz etmeğin zimmetinde kalmışdi hâlâ mezbûr Ali’den suâl olunup aynı mevcûd ise aynını değil ise kıymet-i şer‘iyyesini taleb ederim alıverilmesi matlûbumdur dedikde gıbbe’s-suâl mezbûr Ali cevâbında fi’l-vâki‘ târih-i mezbûrda müdde‘î-i mezbûr İspolyot yedinden vech-i muharrer üzre bin sekiz yüz beylik nîme tuğlayı ahz ü kabz eylediğini tav‘an ikrâr ve i‘tirâf eylediğinden sonra zikr olunan bin sekiz yüz beylik nîme tuğlanın aynı mevcûd ise aynını değil ise kıymet-i şer‘iyyesini müdde‘î-i mezbûr İspolyot’a edâ ve teslîme mezbûr Ali’ye ba‘de’t-tenbîh mâ vaka‘a bi’t-taleb ketb olundu. Fi’l-yevmi’s-sâmin aşer min Şa‘bân li sene tis‘în ve elf. Şuhûdü’l-hâl: Mahmud Bey b. Mehmed Bey, Hüseyin Beşe b. Sefer, Ali b. Abdurrahman, Abdülbâkī b. Ömer, Mustafa Beşe b. Hüseyin, Hüseyin Çelebi b. Abdullah, Yusuf b. Abdullah, Abdullah b. Abdülmennân