Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 151 Hüküm no: 183 Orijinal metin no: [105-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Musa’nın Hasköy’de oturmak şartıyla evlendiği kocası Mahmud b. Mehmed’in İstanbul’a taşınmak istediği, mahkeme kararıyla bundan men edildiği Havâss-ı Aliyye kazâsı müzâfâtından kasaba-i Hasköy mahallâtından el-Hâc Şaban mahallesi sâkinelerinden bâ‘iset-i hâze’l-vesîka Fâtıma bt. Musa nâm hâtunun sadrî kebîr oğlu ve husûs-ı âti’l-beyânı da‘vâya vekîli olup vekâleti bimâ hüve nehcü’s-sübût şer‘an sâbite olan Ahmed b. Hasan nâm kimesne meclis-i şer‘de müvekkile-i mezbûre Fâtıma’nın zevc-i dâhilün bihâsı Mahmud b. Mehmed mahzarında bi’l-vekâle üzerine da‘vâ ve takrîr-i kelâm edip mezbûr Mahmud vâlidem müvekkile-i mezbûre Fâtıma’yı bin akçe mehr-i müeccel ile nefsi için tezvîc ve inkâh murâd eylediğinde kasaba-i mezbûreden nakl edip mahmiye-i İstanbul’da iskân murâd eder isem müvekkile-i mezbûre Fâtıma boş olsun deyû hîn-i akidde şart etmişdi hâlâ vâlidem müvekkile-i mezbûre Fâtıma’yı kasaba-i mezbûreden nakl edip mahmiye-i mezbûrede iskân murâd eder suâl olunup mezbûr Mahmud’un şartına binâen kasaba-i mezbûreden nakl olmamak üzre kıbel-i şer‘den tenbîh olunması matlûbumdur dedikde gıbbe’s-suâl akībe’l-inkâr vekîl-i mezbûrdan takrîrine mutâbık beyyine taleb olundukda mahalle-i mezbûre sâkinlerinden Süleyman Çelebi b. Ramazan ve İbrahim b. Abdullah ve Mehmed Bey b. Ahmed ve Mustafa b. Ahmed nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûr Mahmud müvekkile-i mezbûre Fâtıma’yı nefsi için bin akçe mehr-i müeccel ile tezvîc ve inkâh murâd eylediğinde kasaba-i mezbûreden nakl edip mahmiye-i mezbûrede iskân murâd eder isem müvekkile-i mezbûre Fâtıma boş olsun deyû hîn-i akidde bizim huzûrumuzda şart eyledi biz bu husûsa bu vech üzre şâhidleriz ve şehâdet dahi ederiz deyû her biri edâ-yı şehâdet-i şer‘iyye eylediklerinde [106] ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a olmağın mûcebiyle müvekkile-i mezbûre Fâtıma’yı kasaba-i mezbûreden nakl etmemek üzre mezbûr Mahmud’a tenbîh birle mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed Bey b. Ali, Ali Çelebi b. Abdurrahman, Dilâver Bey b. Abdullah, Mustafa Çelebi b. Hasan, Mustafa Çelebi b. Abdullah, Yusuf b. Abdullah, Hüseyin b. Hasan, Mustafa Çelebi b. Mehmed