Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 152 Hüküm no: 184 Orijinal metin no: [106-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mehmed’in Ömer Beşe b. Mehmed’den talep ettiği alacağının daha önce Âişe Hâtun’un emriyle damadı Mehmed’e ödendiğinin tespiti Mahmiye-i İstanbul’da Koca Mustafa Paşa mahallesi sâkinelerinden Âişe bt. Mehmed nâm hâtun meclis-i şer‘-i hatîr-i lâzımü’t-tevkīrde Havâss-ı Aliyye kazâsı müzâfâtından kasaba-i Hasköy sûkunda debbağ olan işbu râfi‘ü’l-kitâb Ömer Beşe b. Mehmed mahzarında üzerine da‘vâ ve takrîr-i kelâm edip mezbûr Ömer Beşe’ye cihet-i karz-ı şer‘îden on buçuk esedî guruş def‘ ve teslîm ol dahi vech-i muharrer üzre yedimden ahz ü kabz etmeğin meblağ-ı mezbûru taleb ederim suâl olunup alıverilmesi matlûbumdur dedikde gıbbe’s-suâl mezbûr Ömer Beşe cevâbında fi’l-vâki‘ müdde‘iye-i mezbûre Âişe meblağ-ı mezbûr on buçuk esedî guruşu gāib ani’l-meclis dâmâdı Mehmed’e def‘ ve teslîm [et] deyû emr etmeğin müdde‘iye-i mezbûrenin emrine binâen dâmâdı gāib-i mezbûra def‘ ve teslîm eyledim deyû def‘le mukābele edicek isre’l-istintâk ve akībe’l-inkâr mezbûr Ömer Beşe’den def‘-i mezbûrunu mübeyyine beyyine taleb olundukda udûl-i müslimînden olup kasaba-i mezbûre mahallâtından Turşucuzâde Hüseyin Çelebi mahallesinde imâm olan Ali Efendi b. el-Hâc Mehmed ve yine Turşucuzâde Hüseyin Çelebi mahallesinde sâkin Debbağ İbrahim b. Halil nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iye-i mezbûre Âişe meblağ-ı mezbûr on buçuk esedî guruşu dâmâdı gāib-i mezbûr Mehmed’e def‘ ve teslîm ile emr etmeğin mezbûr Ömer Beşe dahi müdde‘iye-i mezbûrenin emrine binâen meblağ-ı mezbûr on buçuk esedî guruşu bizim huzûrumuzda gāib-i mezbûr Mehmed’e def‘ ve teslîm eyledi biz bu husûsa bu vech üzre şâhidleriz şehâdet dahi ederiz deyû her biri edâ[-i] şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ olmağın mûcebiyle müdde‘iye-i mezbûre Âişe bî-vech mu‘ârazadan men‘ birle mâ hüve’l-vâki‘ bi’t-taleb ketb [olundu]. Fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed Bey b. Ali, Mehmed Çelebi b. Siyavuş, Abdullah Çelebi b. Mehmed Ağa, Ali Çelebi b. Abdurrahman