Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 156 Hüküm no: 190 Orijinal metin no: [110-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Yazıcı b. Ömer’in Vardabaşo v. Mordehay’da karpuz ve armut bedelinden olan alacağını talep ettiği Mahrûse-i Galata hısnı ebvâbından Karaköy kapısı dâhilinde sâkin işbu râfi‘ü’l-kitâb Halil Yazıcı b. Ömer nâm kimesne meclis-i şer‘-i hatîr-i lâzımü’t-tevkīrde Havâss-ı Aliyye kazâsı müzâfâtından kasaba-i Hasköy sûkunda sâkin Yahud tâifesinden Vardabaşo v. Mordehay mahzarında üzerine da‘vâ ve takrîr-i kelâm edip mezbûr Yahudi zimmetinde karpuz bahâsından iki yüz yirmi [iki] akçe ve armut bahâsından üç yüz altmış akçe ki cem‘an beş yüz seksen iki akçe hakkım olup taleb eylediğimde edâdan imtinâ‘ eder suâl olunup meblağ-ı mezbûr beş yüz seksen iki akçenin alıverilmesi matlûbumdur dedikde gıbbe’s-suâl mezbûr Vardabaşo cevâbında fi’l-hakīka müdde‘î-i mezbûr Halil Yazıcı’ya karpuz bahâsından iki yüz yirmi iki akçe ve armut bahâsından üç yüz altmış akçe ki cem‘an beş yüz seksen iki akçe zimmetimde vâcibü’l-edâ ve lâzımü’l-kazâ deynimdir deyû bi tav‘ihî ikrâr ve i‘tirâf etmeğin alâ mûceb-i i‘tirâfihî meblağ-ı mezbûr beş yüz seksen iki akçeyi müdde‘î-i mezbûr Halil Yazıcı’ya edâ ve teslîme mezbûr Vardabaşo Yahudiye tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene tis‘în ve elf. Şuhûdü’l-hâl: Süleyman Çelebi b. Ramazan, Ali Çelebi b. Abdurrahman, Abdülbâkī b. Ömer, Halil b. Selim, Hüseyin b. Hasan [Sayfa sonunda:] beyaz sahîh, beyaz sahîh, beyaz sahîh. Temmeti’s-sicillü’l-mahfûz.