Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 156 Hüküm no: 189 Orijinal metin no: [109-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Subaşı Hacı Mehmed b. Mehmed’in Kazer v. Hanes’in anasına ve avratına küfrettiği Havâss-ı Aliyye kazâsı müzâfâtından kasaba-i Hasköy mahallâtından Turşucuzâde Hüseyin Çelebi mahallesi sükkânından Kazer v. Hanes nâm Ermeni meclis-i şer‘-i hatîr-i lâzımü’t-tevkīrde kasaba-i mezbûrede bi’l-fi‘l subaşı olan el-Hâc Mehmed b. Mehmed mahzarında üzerine da‘vâ ve takrîr-i kelâm edip mezbûr el-Hâc Mehmed târih-i kitâb günü bi gayrı hakkın benim anama ve avratıma cimâ‘ lafzıyla şetm edip behey gidi godoş başın avratın fercine [110] ve dilini avratının fercine sok deyip bana hilâf-ı şer‘-i şerîf şetm eylemişdir suâl olunup ihkāk-ı hak olunmak matlûbumdur dedikde gıbbe’s-suâl mezbûr el-Hâc Mehmed cevâbında fi’l-hakīka târih-i kitâb günü müdde‘î-i mezbûr Kazer’in anasına ve avratına bi gayrı hakkın cimâ‘ lafzıyla şetm edip behey gidi godoş başın avratının fercine ve dilini avratının fercine sok deyip hilâf-ı şer‘-i şerîf şetm eylediğini bi tav‘ihî ikrâr ve i‘tirâf etmeğin mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li sene tis‘în ve elf. Şuhûdü’l-hâl: Süleyman Çelebi b. Ramazan, Ali Çelebi b. Abdurrahman, Hasan Çelebi b. Mustafa, Dilâver Bey b. Abdullah, Abdülbâkī b. Ömer