Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 123 Hüküm no: 86 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musli Ağa’nın vefat eden eşi İsmihan’da emanet olan parasının Beytülmâl Emini Mehmed Ağa’dan tahsil olunması Efendi hazretleri imzâsıyladır. Hüccet, emânet vaz‘ olan meblağ isbât birle edâya hüküm Dârü’l-hilâfeti’l-aliyye Kostantıniyyetü’l-mahmiye’de Laleli Çeşme kurbünde Ahmed Ağa mahallesinde sâkine iken bundan akdem vefât eden İsmihan bt. Oruç Ağa nâm hatunun zevc-i metrûku zahrü’l-akrân Musli Ağa b. Abdülmennan’dan gayrı vârisi olmamağla terekesinin nısfı irsen mûmâ-ileyh Musli Ağa’ya ve nısf-ı âharı beytülmâle âid olduğu şer‘an sâbit oldukdan sonra bâ‘isü hâze’l-kitâb mûmâ-ileyh Musli Ağa meclis-i şer‘-i şerîfde mahmiye-i mezbûrede Hâssa beytülmâli emîni olmağla müteveffâ-yı mezbûrenin nısf terekesine beytülmâl için vâzı‘u’l-yed olan Mehmed Ağa b. Ahmed mahzarında üzerine da‘vâ ve takrîr-i kelâm edip bin ( ) senesinde Kütahya Beylerbeyisi olan Mehmed Paşa deyn-i şer‘îden zimmetinde hakkım olan bin dört yüz guruşu mahmiye-i mezbûrede ev kethüdâsı olan Oruç Ağa yedi ve emrim ile müteveffâ-yı mezbûreye mahmiye-i mezbûrede Seydi Bey mahallesinde sâkine iken îdâ‘ ve teslîm, müteveffât-ı mezbûre dahi istîdâ‘ ve kabz etdiğinden sonra meblağ-ı mezbûru bana vermeyip mücehheleten vefât etmekle mezbûr Mehmed Ağa’ya suâl olunup tereke-i vâfiyesinden edâya mezbûr Mehmed Ağa’ya tenbîh olunmak matlûbumdur dedikde, gıbbe’s-suâl ve’l-inkâr mûmâ-ileyh Musli Ağa’dan müdde‘âsını mübeyyine beyyine taleb olundukda mahmiye-i mezbûrede Kızıltaş mahallesi ahâlîsinden olup dergâh-ı âlî yeniçerileri çorbacılarından olan Mustafa Ağa b. Ali ve sâlifü’z-zikr Seydi Ömer mahallesi ahâlîsinden Ahmed Hoca b. Halil ve Cağaloğlu Sarayı kurbünde sâkin Yusuf Bey b. Süleyman ve Eğrikapı dâhilinde Kocamustafapaşa mahallesi sükkânından Mehmed b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mûmâ-ileyh Mehmed Paşa’nın ev kethüdâsı olan mezbûr Oruç Ağa bizim huzûrumuzda müteveffât-ı mezbûreye kethüdâsı olduğum Mehmed Paşa zevcin Musli Ağa’ya deyni olan bin dört yüz guruş zevcin tarafından sana îdâ‘ için bana irsâl etmişdir deyü bin dört yüz guruşu müteveffât-ı mezbûreye târîh-i mezbûrede îdâ‘ ve teslîm, ol dahi ahz u kabz etmiş idi, mezbûre İsmihan meblağ-ı mezbûru mücehheleten vefât etmekle terekesinden edâ lâzımdır, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olup mûmâ-ileyh Musli Ağa tahlîf-i şer‘î ile tahlîf olundukdan [sonra] mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sâmin aşer min-Cumâdelâhire li-sene ihdâ ve semânîn ve elf. Şuhûdü’l-hâl: el-Hâc Hüseyin b. İbrahim çukadâr-ı hazret efendi, Mehmed Çelebi b. Abdi, Ebubekir Çelebi b. Ömer, el-Hâc Yusuf b. Oruç, İbrahim Efendi el-kâtib,