İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 76 Hüküm no: 29 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey oğulları Mehmed Ağa ve Ahmed Bey’in arsalarını Gevherhan Sultan’a satmaları Fahrü’l-akrân Mehmed Ağa ve Ahmed Bey ibney Ali Bey b. Mehmed meclis-i şer‘de sultânü’l-muhadderât burhânü’l-muvakkarât tâcü’l-mestûrât iklîletü’l-muhassanât safiyyetü’s-sıfât aliyyetü’z-zât zâtü’l-aliyy ve’s-sa‘âdât Gevherhan Sultan -dâmet ismetuhâ- taraf-ı karînü’[ş-şe]reflerinden tasdîk-i âti’z-zikre vekîl olup, müşârun-ileyhâ hazretlerini ma‘rifet-i şer‘iyye ile ârifeyn olan Ahmed Bey b. Ali ve Murad Bey b. Abdullah şehâdetleri ile vekâleti sâbite olan fahrü’l-eşbâh Fazlullah Çavuş b. ( ) mahzarında her biri ikrâr ve takrîr-i kelâm edip, mahmiye-i Üsküdar’da vâki‘ bir tarafı Vezîr-i rûşen-zamîr Mehmed Paşa hazretleri mülküne ve etrâf-ı selâsesi tarîk-i âmma müntehî arsasının merhûm Bâli Çavuş vakfına yılda üç yüz altmış akçe mukāta‘ası üzerine mağrûs ale’s-seviyye mülkümüz olan eşcâr ve kürûmu mûmâ-ileyhâ Gevherhan Sultan hazretlerine doksan yedi bin nakd-i fıdda-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledik, müşârun-ileyhâ hazretleri dahi ibtiyâ‘ ve kabûl ve kabz eyledi dediklerinde, mukırrûn-ı mezbûrûnun vech-i merkūm üzre cârî olan ikrârını vekîl bi’t-tasdîk olan mersûm Fazlullah Çavuş bi’l-muvâcehe tasdîk edicek mâ vaka‘a bi’t-taleb ketb olundu. Tahrîren fi’l-yevmi’t-tâsi‘ aşer min Saferi’l-hayr li sene seb‘a ve ışrîn ve elf. Şuhûdü’l-hâl: Fahrü’l-a‘yân Mehmed Çelebi, Ali b. Mustafa, Receb Bey b. İskender, Derviş b. Abd Hasan Çavuş, Mustafa b. Mehmed.