İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 78 Hüküm no: 32 Orijinal metin no: [3a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Defterdâr Seyfullah Vakfı eski mütevellisi Hacı Hürrem b. Abdullah’ın olan borcu karşılığında vakfa rehin vermesi Mahmiye-i İstanbul’da vâki‘ Defterdâr Seyfullah vakfına berât-ı pâdişâhîyle hâlâ mütevellîsi olan Musa Efendi b. Halil meclis-i şer‘-i kavîm-i lâzımü’t-tekrîmde sâbıkan vakf-ı mezbûr mütevellîsi olan el-Hâc Hurrem b. Abdullah mahzarında takrîr-i da‘vâ edip, bundan akdem merkūm el-Hâc Hurrem’in muhâsebesi görüldükde, vakf-ı mezbûr mâlından zimmetinde yirmi üç bin dört yüz kırk yedi akçe zuhûr etmekle, meblağ-ı merkūmun on yedi bin akçesi mukābelesinde merkūm el-Hâc Hurrem beynimizde ma‘lûm ba‘zı mülk emti‘a-i mütenevvi‘asını bana rehin vaz‘ edip ve altı bin dört yüz kırk yedi akçesi mukābelesinde mahmiye-i Üsküdar’da Kazasker Câmi‘i mahallesinde vâki‘ bir tarafı Mehmed Ağa b. Abdullah mülküne ve bir tarafı Ömer b. Mehmed mülküne ve bir tarafı yine merkūm el-Hâc Hurrem mülküne ve bir tarafı tarîk-i âmma müntehî olan mülk menzilini ve yine mahalle-i mezbûrede vâki‘ bir tarafı Gazanfer b. Abdullah mülküne ve bir tarafı Mehmed b. Abdullah mülküne ve bir tarafı Mehmed Ağa b. Abdullah mülküne ve bir tarafı tarîk-i âmma müntehî olan mülk menzillerini rehin vaz‘ edip, ba‘de’t-tahliyye teslîm eylemişdir. Suâl olunup takrîri tahrîr olunmak murâd ederim dedikde, gıbbe’s-suâl merkūm el-Hâc Hurrem cevâbında, fi’l-vâki‘ vakf-ı mezbûr mâlından vech-i merkūm üzre zimmetimde yirmi üç bin dört yüz kırk yedi akçe olup, on yedi bin akçe mukābelesinde beynimizde ma‘lûm emti‘a-i mütenevvi‘a ve altı bin dört yüz kırk akçe mukābelesinde zikri sebk eden mülk menzillerimi vech-i merkūm üzre rehin vaz‘ eylemişimdir dedikde, vâki‘ hâl bi’t-taleb ketb olundu. Tahrîren fî evâsıtı Saferi’l-hayr li sene seb‘a ve ışrîn ve elf. Şuhûdü’l-hâl: Murad b. Mehmed, Mehmed b. Ahmed, Mehmed b. Eyüb, Hasan b. Emir, Mehmed b. Mustafa, Ali b. Mehmed ve gayruhüm.