İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 78 Hüküm no: 33 Orijinal metin no: [3a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nasûh’un Râbia Hâtun’daki alacağını tahsil ettiği Mahmiye-i İstanbul’da Şeyh Ferhad mahallesi sâkinlerinden olup Matbah-ı Sultânî üstâdlarından fahrü’l-akrân Üstâd Nasûh b. Mehmed’e meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda mahmiye-i mezbûrede Ayasofya-i kebîr mahallesinde sâkine olup bâ‘isetü’l-kitâb olan mefharü’l-muhadderât Râbia Hâtun bt. Ali tarafından ikrâr-ı âti’l-beyânı tasdîka nehc-i şer‘î üzre vekâleti sâbite olan emîrü’l-ümerâ’i’l-kirâm sâhibü’d-devleti ve’l-ihtirâm Mehmed Paşa b. el-merhûm Musa muvâcehesinde ikrâr ve i‘tirâf edip, mezbûre Râbia Hâtun zimmetinde deyn-i şer‘îden hakkım olan yüz yetmiş iki bin akçeye hâzır bi’l-meclis olan Hüseyin Dede b. Hasan emr ve kabûlü hâviye kefâletle kefîl olmuşdu. El-hâletü hâzihî meblağ-ı mezbûr mukābelesinde altmış bin akçe kıymetli yeşim üzre yâkut ile murassa‘ bir topuz ve yirmi üç bin akçe kıymetli altın sevâdlı bir murassa‘ raht ve on sekiz bin akçe kıymetli bir dikme abayî ve yirmi beş bin akçe kıymetli bir dikme dülbent örtüsü ve on iki bin akçe kıymetli Eflakiyye Kâmile nâm câriye-i dellâke ve bin akçe kıymetli bir donluk atlas ve otuz üç bin nakd akçe ki cem‘an yüz yetmiş iki bin akçe olur bi’t-tamâm vekîl-i mezbûr yedinden ahz u kabz eyleyip asîl ve kefîlin zimmetlerini ibrâ eyledim dedikde, mukırr-ı mezbûru ikrâr-ı meşrûhunda vekîl-i müşârun-ileyh vicâhen tasdîk edicek, mâ vaka‘a kayd şüd. Fi’t-târihi’l-mezbûr. Şuhûdü’l-hâl: Emîrü’l-ümerâ’i’l-kirâm Ahmed Paşa, Mustafa b. Hızır, Musa Dede b. Sinan, Ahmed Bâşe b. Abdullah ve gayruhüm.