İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 80 Hüküm no: 36 Orijinal metin no: [3b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstemad oğulları Bakkal Nikola ve Todori’nin kefâlet kaydı Mahmiye-i İstanbul’da bakkāl tâ’ifesinden Nikola ve Todori veledey İstemad nâm zimmîler meclis-i şer‘de mahmiye-i mezbûrda merhûm Ferhad Çavuş vakfına berât-ı âlîşân ile bi’l-fi‘il mütevellî olan fahrü’l-e’immeti’l-kirâm Mehmed Efendi b. Nasreddin el-imâm muvâcehesinde ikrâr-ı tav‘î kılıp, vakf-ı mezbûr mâlından mütevellî-i merkūm yediyle zimmetimizde ale’s-seviyye deyn olmak üzre karz-ı şer‘îden altmış iki bin akçe ve târih-i kitâb min şehri Saferi’l-hayrı’nın gurresinden sene tamamına değin ba‘zı çuka-bahâsından altı bin iki yüz akçe cem‘an altmış sekiz bin sekiz yüz akçe edâsı lâzım deynimiz olup, meblağ-ı mezbûrda herbirimizin zimmetine edâsı lâzım olan meblağa emr ve kabûlü hâviye kefâlet ile biri birimize kefîl olduk dediklerinden, mukırrân-ı mezbûrân zimmetleri vech-i meşrûh üzre sâdır olan ikrârlarından mütevellî-i mesfûr eş-Şeyh Mehmed Efendi vicâhen tasdîk ettikden sonra, İsteryanos v. Şerilo ve Şelo v. Dimitri ve Yorgi v. Andon nâm zimmîler takrîr-i kelâm edip, merkūmân Nikola ve Todori nâm medyûnların nefislerine ve hîn-i mütâlebede meclis-i şer‘a ihzârlarına kefîl olduk ve eğer gāib olmakla meclis-i şer‘a ihzârlarında âciz olursak meblağ-ı merkūm altmış sekiz bin sekiz yüz akçeye emr ve kabûlü hâviye kefâletle kefîl olduk dediklerinden sonra mezkûrân medyûnlar iâde-i kelâm edip, zimmetimizde çuka bahâsından olan meblağ-ı merkūm altı bin iki yüz akçe ve senesi tamamına değin her ayda beş yüz on yedişer akçeyi mütevellî-i mûmâ-ileyhe edâ ve teslîm edelim deyû ta‘ahhüd ettiklerinde, mâ vaka‘a bi’t-taleb ketb olundu. Hurrire fî evâhiri Safer li sene seb‘a ve ışrîn ve elf. Şuhûdü’l-hâl: Ahmed Efendi el-imâm, Murtaza b. Ramazan, İbrahim b. Bektaş, İbrahim b. Murad, Mehmed b. Ali, Mehmed b. Mirsad.