İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 79 Hüküm no: 35 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynî bt. İbrahim’in evini kızı Ayşe’ye hibe ettiği Mahmiye-i İstanbul’da Küçük Karaman kurbunda vâki‘ Hoca Hayreddin mahallesi sâkinelerinden fahrü’l-muhadderât Aynî Hâtun bt. İbrahim Bey meclis-i şer‘-i şerîfde, sadriye kızı olan bâ‘isetü’l-kitâb Ayşe Hâtun bt. Mehmed Bey tarafından ikrâr-ı âti’z-zikri tasdîka nehc-i şer‘î üzre vekâleti sâbite olan zevci Ali Bey b. Abdullah el-yesârî muvâcehesinde ikrâr ve ta‘bîr ani’l-merâm edip, bundan esbak müteveffât olan vâlidem merhûme Hanım’dan irs-i şer‘î ile bana intikāl eyleyip mahalle-i mezbûrede vâki‘ bir tarafı Ekmekcizâde İbrahim Çelebi mülkü ile ve bir tarafı kendi mülküm ile ve iki tarafı tarîk-i âm ile mahdûd ve arsası şatrancî hesâbı üzre bin iki yüz seksen zirâ‘ olup, bir bâb tahtânî odalı ve bir ahırı ve bir bâb tahtânî kahvehâneli ve üstlerinde beş bâb odaları ve ortası havlu, selâmlığı ve kenîfi ve zikr olunan kahvehâne kurbunda biribirine muttasıl altı bâb taş duvarlı dükkânları ve yine bir bâb tahtânî evi ve sofayı ve su kuyusunu ve fırını ve eşcâr-ı müsmire ve gayr-i müsmireyi muhtevîye hadîkayı müştemil olan mülk menzilimi, ba‘de’t-tahliyye hibe-i sahîha-i şer‘iyye ile sadriye kızım mersûme Ayşe Hâtun’a târih-i kitâbdan on sene mukaddem hibe ve temlîk ve teslîm eyledim, ol dahi ittihâb ve kabûl ve kabz eylemişdi. Hâlâ menzil-i mezbûr merkūme Ayşe Hâtun’un mülk-i mevhûbudur, kat‘â benim alâka ve medhalim kalmamışdır dedikde, mukırre-i mûmâ-ileyhâyı ikrâr-ı meşrûhunda vekîl-i mersûm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olunup yed-i tâlibe def‘ olundu. Tahrîren fi’l-yevmi’s-sâbi‘ aşer min Saferi’l-hayr li sene 1026. Şuhûdü’l-hâl: Şaban Efendi b. el-Hâc Ömer el-müderris, Mehmed Efendi b. Kemaleddin el-mülâzım, Mustafa Reis b. Abdullah, Derviş Mehmed Kahveci, Üstâd Ali b. Rıdvan, Hasan b. Abdullah, Ahmed b. Mustafa, el-Hâc Hasan [b.] İsmail.