İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 88 Hüküm no: 49 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âsûde Sultan Vakfı’na ait çifte hamamın tamir keşfi Mahmiye-i İstanbul’da vâki‘ merhûm Âsûde Sultan vakfına bi’l-fi‘l mütevellî olan Mehmed Ağa b. Mustafa meclis-i şer‘-i şerîfde sevk-i kelâm edip, vakf-ı mezbûrdan olup mahmiye-i merkūmede el-Hâc Küçük mahallesinde vâki‘ çifte hamamın hazînesi yarılıp ve dolabı bozulup ve külhanının taşları tecdîd olunmak lâzım olup ve ba‘zı yerleri meremmete muhtâc olmağın, bundan akdem kıbel-i şer‘den nâ’ib ve muhammin ile üzerine varılıp imâret ve meremmeti için dokuz bin kırk beş akçe tahmîn olunup mâl-ı vakf ile ta‘mîrine izin verilmişdi. Lâkin hazînesinin ziyâde yarıkları zuhûr edip ve tahmîn olunandan gayrı nice mevâzi‘i meremmet olunmağla meblağ-ı merkūm kifâyet etmeyip, cem‘an on sekiz bin elli akçe harcım olmuşdur. El-hâletü hâzihî kıbel-i şer‘den üzerine varılıp mertebe-i tahammülü ta‘yîn olunmak taleb ederim dedikde, savb-ı şer‘den Mevlânâ Mahmud irsâl olunup ve hâssa mi‘mârlardan Üstâd Mustafa ve Üstâd Ali ve zeyl-i kitâbda esâmisi mastûr olan Müslimîn ile mahall-i mezbûra vardıklarında, mi‘mârân-ı mezbûrân hamam-ı merkūmun ta‘mîr olunan mevâzi‘ini tahmîn edip, zikr olunan hazînenin meremmetine yedi bin altı yüz kırk akçe ve löklerine dört yüz akçe ve tahtadan ustura halvetine dört yüz akçe ve dolab çarhına üç bin akçe ve döşeme için beş aded kayagan taşına yüz elli akçe ve altı aded mermer taşına doksan akçe ve külhana vaz‘ olunan dört aded taşa dört yüz seksen akçe ve avratlar hamamının kubbesi meremmetine bin iki yüz ve cehennemin tathîrine beş yüz akçe ve kapı tahtalarına ve direklerine dört yüz akçe ve hamam kızdırması için dört günde hark olunan oduna iki bin beş yüz akçe ve batalyasına sekiz yüz akçe cem‘an on sekiz bin elli akçe sarf u harc olunmuşdur. Meblağ-ı merkūma tahammül mukarrerdir deyû haber verip ve sâir bî-garaz Müslümanlar dahi vech-i meşrûh üzre icmâ‘ vü ittifâk ettiklerini mevlânâ-yı mûmâ-ileyh mahallinde tahrîr ve mahfil-i kazâda takrîr etmeğin, mâ hüve’l-vâki‘ gıbbe’t-taleb ketb ü tahrîr olundu. Tahrîr fi’l-yevmi’s-sâdis ve’l-ışrîn min Saferi’l-hayr li sene seb‘a ve ışrîn ve elf. Şuhûdü’l-hâl: Yusuf b. Mustafa en-nâzır, Zekeriya b. Sinan el-kâtib, Veli b. Hasan el-câbî, Mehmed b. Yusuf en-nâzır ve Şaban Usta ed-debbâğ ve gayruhüm.