İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 87 Hüküm no: 48 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müneccimzâde Vakfı’na ait hanın su yoluna bitişik kanalizasyon ve tuvaletlerin nakil keşfi Mahmiye-i İstanbul’da Müneccimzâde vakfına bi’l-fi‘il mütevellî olan hâfızu’l-kitâb Mehmed Çelebi b. Ahmed meclis-i şer‘a gelip bast-ı kelâm edip, evkāf-ı mezbûreden olup mahmiye-i Küçük Karaman Çarşısı’nda vâki‘ lede’l-cîrân hudûdu ma‘lûm olup, yirmi sekiz bâb odaları müştemil olan hanın içinde merhûm Sultan Süleyman Hân câmi‘-i şerîfinin suyu mürûr etmeğin, han-ı mezbûrun dolma taş duvarına zararı olduğundan gayrı han-ı mezbûr kenîflerinin kârîzi dahi suyoluna mülâsık olmakla suyolu meremmeti takarrubu ile zikr olunan kârîzin dahi ba‘zı mevâzi‘ine halel târî olmakla cereyânda kalıp taşra çıkmak ile cemî‘-i ebniyesine zarar tatarruk etmeğin, bundan akdem kıbel-i şer‘den üzerine nâ’ib ve muhammin varıp vech-i meşrûh üzre zararı mukarrer olmağın, zikr olunan kârîz ve kenîfler âhar yere nakli lâzım oldukda, vakf-ı mezbûr bozahânesinin han-ı merkūma mülâsık olan tarafına nakl olunup ve kadîmi kenîfler bozulup yeri bozahâneye ilhâk olunmak münâsib ve her vechile vakfa nâfi‘ olmağın cânib-i şer‘den izin verilip mesârifine beş bin akçe tahmîn olunmuşdu. El-hâletü hâzihî zikr olunan kenîfleri bozup yerlerini bozahâneye ve kârîzi Küçükhamam kârîzine ilhâk eylediğimden mâ‘adâ otuz üç bâb odaların sakflarını ta‘mîr ve müceddeden bir bâb fevkānî oda binâ eyleyip ve havlusunun kaldırımını ta‘mîr edip ve tahtadan perde ihdâs etmekle meblağ-ı merkūm kifâyet etmeyip cem‘an yirmi bin akçemiz cem olmuşdu. Hâlâ kıbel-i şer‘den üzerine varılıp mertebe-i tahammülü ta‘yîn olunmak taleb ederim dedikde, savb-ı şer‘den Mevlânâ Mahmud irsâl olunup, hâssa mi‘mârlarından Üstâd Mustafa b. Abdullah ve zeyl-i kitâbda esâmisi mastûr olan Müslimîn ile mahall-i mezbûra vardıklarında, mütevellî-i mezbûrun takrîri üzre binâ ve ta‘mîr olunmuş bulunmağın, ba‘de’t-tahmîn zikr olunan kenîflerin nakline ve kârîzin ilhâkına üç bin sekiz yüz yetmiş iki akçe ve tahta perdeye altı yüz akçe ve sakflarının ta‘mîrine iki bin sekiz yüz akçe ve müceddeden bir bâb odanın binâsına sekiz bin akçe ve zeyl-i ihrâcına ve ba‘zı levâzım-ı mühimmesine bin sekiz yüz elli akçe cem‘an on yedi bin yüz yirmi iki akçe sarf olunmuşdur, noksan ile ta‘mîr de mümkün değildir deyû mi‘mâr-ı mezbûr ve sâir ehl-i vukūf haber verdiklerini mevlânâ-yı mezbûr mahallinde tahrîr ve mahfil-i kazâda takrîr etmeğin, mâ vaka‘a bi’t-taleb ketb olundu. Tahrîren fî evâhiri Saferi’l-hayr li sene seb‘a ve ışrîn ve elf. Şuhûdü’l-hâl: El-Hâc Pervâne b. Abdullah, el-Hâc Hasan b. Abdullah, Mehmed b. Ebûbekir, es-Seyyid Hüseyin b. es-Seyyid Mustafa ve gayruhüm.