İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 90 Hüküm no: 53 Orijinal metin no: [5b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Nişâncı Abdülkerim Vakfı’na ait evin kirasının belirlenmesi
Mahmiye-i İstanbul’da merhûm Nişâncı Abdülkerim vakfına bi’l-fi‘il mütevellî olan sâhibü’l-kitâb Mahmud Çelebi b. İbrahim meclis-i şer‘-i şerîfe gelip bast-ı kelâm edip, vakf-ı mezbûrdan mahmiye-i mezbûrede Elvanzâde mahallesinde vâki‘ iki bâb fevkānî ve iki tahtânî evleri ve cüneyne ve kenîfi ve muhavvatayı hâvî olup, iki bin dört yüz akçe icâre-i mu‘accele ve her ayda iki yüz akçe ücret-i müecceli ile Mustafa Bey ve zevcesi Aynî Hâtun ale’s-seviyye mutasarrıf oldukları menzilin ücret-i mezbûre ecr-i misli değildir hâlâ kıbel-i şer‘den üzerine varılıp ecr-i misl takdîr olunmak taleb ederim dedikde, savb-ı şer‘den Mevlânâ Mahmud irsâl olunup hâssa mi‘mârlardan Üstâd Ali ve Üstâd Mustafa ve zeyl-i kitâbda esâmisi mastûre olan bî-garaz Müslimîn ile mahall-i mezbûra varılıp müşâhede olundukda, menzil-i mezbûrun zikr olunan iki bin dört yüz akçe icâre-i mu‘accel-i ve yevmî on iki akçe ücret-i müecceli ecr-i misli olup belki dahi ziyâdeye mütehammildir deyû mi‘mârân-ı mezbûrân ve sâir bî-garaz Müslümanlar haber verdiklerini mevlânâ-yı müşârun-ileyh mahallinde tahrîr ve mahfil-i kazâda takrîr etmeğin, mâ hüve’l-vâki‘ gıbbe’t-taleb ketb olundu. Fî 28 Safer sene [10] 27.
Şuhûdü’l-hâl: İsmail b. Abdullah [el]-Bevvâb, Receb b. Ali [el]-Bevvâb, İsmail b. Abdullah, Behrâm b. Abdullah, Mehmed b. Resûl el-câbî.
|