İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 92 Hüküm no: 58 Orijinal metin no: [5b-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müslüman mahallesindeki meyhânelerin kaldırılması Mahmiye-i İstanbul’da Hâcce Hâtun mahallesi sâkinelerinden [sâkinlerinden] Ahmed Efendi el-imâm ve İbrahim b. Nasûh el-müezzin ve el-Hâc Mehmed b. Ahmed ve el-Hâc Mehmed b. Mustafa ve el-Hâc Hızır b. Ali ve Kara Hasan mahallesi sâkinlerinden Süleyman Halife b. Yusuf el-imâm ve el-Hâc Osman el-mütevellî ve Ahmed Beşe ve Mehmed b. Abdullah ve Hamza Beşe ve Defterdâr Abdi Çelebi mahallesinde Yusuf Efendi el-imâm ve Derviş Kethüdâ ve Muhsin Çelebi ve Küçük Hasan nâm kimesneler ve sâir cemm-i gafîr meclis-i şer‘-i münîrde hâzırûn olup bast-ı kelâm edip, mahallât-ı mezbûre kadîmden Müslimîn mahalleleri olup etrâfında meyhâne olagelmemiş iken, hâlâ nasrânilerden Kalfa ve Kömürcü ve Yayla nâm zimmîler mezbûr Abdi Çelebi mescidi kurbunda sâkin oldukları evlerini meyhâne edip içinde erbâb-ı şer-şûr şeb-rûz cem‘iyyetle fısk u fücûr ve şürb-i hamr edip hay huylarından mescid-i mezbûrda kemâ-yenbagî edâ-i salâta imkân olmayıp nice fesâda mü’eddî olduğundan mâ‘adâ tarîk-i âmmdan fıçı ile hamr geçirmekleri ile râyiha-i kabîhasından Müslimîn müte’ezzî olmağın, bundan akdem men‘ u def‘ olunmak için emr-i şerîf vârid olmuşken yine memnû‘ olmayıp fesâddan hâlî değildir deyû haber verdiklerinde, hâkim-i muvakki‘i’l-kitâb-ı tûbâ-leh ve hüsnü me’âb hazretleri bi’z-zât zeyl-i kitâbda esâmisi mastûr olan bî-garaz Müslimîn ile mahall-i mezbûra varıp müşâhede buyurduklarında, cemâ‘at-i Müslimînin vech-i meşrûh üzre cârî olan ihbârları cümleten vâkı‘ına mutâbık bulunmağın, merkūmûn zimmîlerin meyhâneler[i] ref‘ olunup ve zikr olunan tarîk-i âmdan fıçı ile hamr geçirmemeleri için kıbel-i şer‘den tenbîh olunup, mâ vaka‘a ketb olundu. Fî evâsıtı Saferi’l-hayr li sene seb‘a ve ışrîn ve elf. Şuhûdü’l-hâl: Mefharü’l-a‘yân Mehmed Ağa Reisü’l-muhzırîn, Ali Bey b. Abdullah Efendi, Hüseyin Çelebi el-müezzin, Kalaycı Üstâd Hasan, el-Hâc Ali el-mismârî, Kemal Efendi el-imâm, Mahmud Beşe er-râcil.