İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 100 Hüküm no: 74 Orijinal metin no: [7b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hamza’nın vakfettiği evde Mehmed Efendi’nin ikâmetine izin verildiği Mahmiye-i Kostantıniyye’de Soğan Ağa mahallesinde vâki‘ bir tarafı Kerime Hâtun mülküne ve bir tarafı ( ) mülküne ve bir tarafı Selmân Ağa vakfına ve taraf-ı râbi‘i tarîk-i âmma müntehî olup, dört bâb tahtânî evleri ve gurfeli ve hücre-i ulviyeli ve ahırı ve ferş ve galeli? binâ ve bi’r ve kenîfi ve zât-ı eşcâr-ı müsmire muhavvatayı müştemil ve hâvî olan menzili merkūm Hacı Hamza nâm sâhibü’l-hayr vakf edip, süknâsını evvelâ zevcesi Selçuk nâm hâtuna ba‘dehâ kendi evlâdına ve evlâd-ı evlâdına ba‘dehum utekāsına ve evlâd-ı utekāsına ve evlâd-ı evlâd-ı utekāsına ba‘dehum mahalle-i merkūme imâmına şart edip, hâlâ süknâsı mahalle-i merkūmede bi’l-fi‘il imâm olan Mehmed Efendi’ye müntakil olup, mezbûr Mehmed Efendi’nin süknâya ihtiyâcı olmadığından mâ‘adâ ıskāt-ı hak eylediği sikāt ihbâr etmeğin, süknâya muhtâc olana tevcîh olunmak lâzım geldikde, zümre-i kuzâtdan zü’l-kadri’l-celî hâfızu’l-kitâb Mehmed Efendi b. Ali süknâya eşedd-i ihtiyâc ile muhtâc olmağın, menzil-i mezkûrûn süknâsı cânib-i şer‘-i kavîmden mezbûr Mehmed Efendi’ye tevcîh olunup, bu kitâb-ı sıhhat-nisâb der-[ber-]sebîl-i temessük ketb ü tahrîr olundukdan sonra yedine def‘ olundu. Lede’l-hâce müzekkeri mâ cerâ ola. Tahrîren fi’l-yevmi’s-sânî ve’l-ışrîn min Saferi’l-hayr li sene seb‘a ve ışrîn ve elf. Şuhûdü’l-hâl: Sâhibü’l-izz ve’l-ikbâl Mehmed Efendi b. Musa ed-defterî, Umdetü’l-müderrisîn Sânî Mehmed Efendi b. Derviş Mehmed, Fahrü’l-kuzât Ali Efendi b. Mustafa, Fahrü’l-kuzât Mehmed Efendi b. el-Hâc Bâli, Şeyh Mehmed Çelebi b. Mehmed el-mülâzım, Fahrü’l-akrân Mehmed Ağa b. Mustafa Reisü’l-muhzırîn, Mehmed Çelebi b. Haydar el-müezzin, Fahrü’l-cüyûş Mustafa Çavuş b. Abdülmennân ve gayruhüm.