İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 102 Hüküm no: 77 Orijinal metin no: [7b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüdâverdi b. Abdullah’ın Molla Gürânî Vakfına ait hamamı, Hacı Receb’e kiraladığı Mahmiye-i İstanbul’da İbrahim Paşa mahallesi sâkinlerinden Hüdâverdi b. Abdullah meclis-i şer‘-i şerîfde işbu sâhibü’l-kitâb el-Hâc Receb b. el-Hâc Şaban muvâcehesinde ikrâr ve ta‘bîr ani’l-merâm edip, mahmiye-i mezbûrede bundan esbak harîk vâki‘ oldukda merhûm Molla Gürânî vakfından olan hamam dahi muhterik olup vakfın müsâ‘adesi olmamağın, izn-i mütevellî ve emr-i hâkimü’ş-şer‘ ile ben imâret ve meremmet edip sarf ettiğim doksan altı bin altı yüz altmış dokuz akçe ücretinden mahsûb olmak üzre mütevellî-i vakf icâre-i tavîle ile bana îcâr eylemişdi. El-hâletü hâzihî hamam-ı mezbûru târih-i kitâb şehri gurresinden müddet-i icârem olan yirmi altı sene tamamına değin yılda üçer bin yedişer yüz on sekizer akçeye mezbûr el-Hâc Receb’e îcâr ve teslîm edip müddet-i merkūmenin ücreti olan cem‘an doksan altı bin altı yüz altmış sekiz akçenin elli bin beş yüz akçesini mezbûr el-Hâc Receb yedinden alıp kabz eyledim, ol dahi vech-i meşrûh üzre hamam-ı mezbûru istîcâr ve kabz eyleyip müddet-i merkūmenin ücreti olan meblağ-ı merkūmdan bâkī kalan kırk altı bin yüz altmış sekiz akçemi târih-i mezbûrdan her ay tamamında biner akçe vermek üzre üç yıl on ay tamamına değin benimle haklaşmağı müte‘ahhid oldu dedikde, mukırr-ı mezbûru ikrâr-ı meşrûhunda el-mukarru lehü’l-mezkûr vicâhen tasdîk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî min şehri Rebî‘ilevvel li sene seb‘a ve ışrîn ve elf. Şuhûdü’l-hâl: Es-Seyyid Kasım Efendi b. es-Seyyid Mustafa Şeyh-i Süleymaniyân, Mahmud Çelebi b. Mehmed en-nüvvâbü’s-sultânî, Ahmed Çelebi b. Sâlih, es-Seyyid Ali b. es-Seyyid Receb, Mehmed b. Receb Yiğitbaşı, Ahmed b. Mustafa, Abdurrahman Çelebi b. Mustafa ve gayruhüm.