İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 101 Hüküm no: 76 Orijinal metin no: [7b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şucâ Çavuş Vakfı’na ait mescid bahçesinin kiralanması Merhûm Şucâ‘ Çavuş vakfından mahmiye-i İstanbul’da Altımermer nâm mevzi‘ kurbunda vâki‘ bir tarafı Arab vakfına ve tarafeyni vakf-ı mezbûr ve taraf-ı râbi‘i tarîk-i âm ile mahdûd olan bahçe ve vâkıf-ı mezbûrun binâ eylediği mescid hareminde olan bahçede vâki‘ olan eşcârın menâfi‘-i ma‘lûmesini, yılda iki yüz akçe icâre-i müeccele ile vakf-ı mezbûr mütevellîsi olan Mehmed nâm kimesne mutasarrıf olup, lâkin ziyâde ücrete tahammülü olmağın, işbu râfi‘ü’l-kitâb Abdürrezzak b. Abdurrahman nâm kimesne yılda bin akçe ziyâde edip cem‘an bin iki yüz akçe icâre-i müeccele ile tâlib olup vakfa nef‘i olmağın, hâkim-i muvakki‘-i sadr-ı kitâb-ı tûbâ-leh ve hüsnü me’âb hazretleri velâyet-i âmmesi hasebiyle târih-i kitâbdan sene tamamına değin icâre-i mezbûre ile merkūm Abdürrezzak’a îcâr ve teslîm ettikden sonra, mahmiye-i mezbûrede vâki‘ Başcı mahallesinde Seyyid Hüseyin b. Mehmed nâm kimesne meclis-i şer‘a hâzır olup icâre-i mezbûreye kefâlet-i sahîha-i şer‘iyye ile kefîl olmağın, mâ hüve’l-vâki‘ bi’t-taleb ketb olundu. Tahrîren fî gurre-i şehri Rebî‘ilevvel min şühûri sene seb‘a ve ışrîn ve elf. Şuhûdü’l-hâl: Mustafa Efendi b. el-Hâc Ali el-cündî?, Mehmed Çelebi b. Hamza, Mehmed b. Abdullah el-cündî, Mehmed b. Zeynel (...) ve gayruhüm.