|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 106 Hüküm no: 86 Orijinal metin no: [8b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Balatlı Mihal v. Preşkova ile İzmarine b. Yorgi’nin alacak hususunda birbirlerinin zimmetlerini ibrâ ettikleri
Mahmiye-i İstanbul’da Balat mahallesinde sâkin Mihal v. Preşkova nâm zimmî neccâr mahfil-i kazâda Kumkapı mahallesi sâkinelerinden işbu sâhibetü’l-kitâb İzmarine bt. Yorgi nâm nasrâniyye mahzarında ikrâr ve takrîr-i kelâm edip, bundan akdem mezbûre İzmarine işbu hâzıra fi’l-meclis kayınanam İstemade bt. Dimitri nâm nasrâniyye ile sana üç bin akçe kıymetli bir munakkaş hâre kaftan ve bin beş yüz akçe kıymetli bir laciverdî ferâce ve yüz ellişer akçe kıymetli iki altınlı arakiye ve bin nakd akçe irsâl eyledim idi deyû benden da‘vâ ve taleb edip, ben dahi mezbûre İzmarine’den zikri sâbık Kumkapı mahallesinde vâki‘ ma‘lûmü’l-hudûd menziline emrin ile kereste ve üstâdiyye ve sâir levâzımına cem‘an on iki bin akçe harc u sarf eyledim deyû da‘vâ ve taleb edip, beynimizde münâza‘ât-ı kesîre ve muhâsamât-ı şedîde ve hatîre vâkı‘a olmuşdu. Hâlâ mezbûre İzmarine zikr olunan eşyânın cümlesinden ferâğ etmeğin, ben dahi meblağ-ı merkūm on iki bin akçe da‘vâsından ferâğ edip târih-i kitâba gelince birbirimizin âmme-i de‘âvâdan [de‘âvîden] zimmetin ibrâ-i âm ile ve ıskāt-ı tâm ile ıskāt ettik dedikde, mezbûr Mihal’i ikrâr-ı meşrûhunda mezbûre İzmarine dahi vicâhen ve şifâhen tasdîk ve vech-i sâbık üzre eşyâ’-i merkūmenin cümlesinden ferâğ edip âmme-i de‘âvîden her biri âharın zimmetin ibrâ ve ıskāt ettiklerin tahkīk etmeğin, mâ hüve’l-vâki‘ alâ vukū‘ihi gıbbe’t-taleb ketb ü tahrîr ve yed-i tâlibine def‘ ve teslîm olundu. Tahrîren fi’l-yevmi’l-hâmis min şehri Rebî‘ilevvel min şühûri sene seb‘a ve ışrîn ve elf.
Şuhûdü’l-hâl: Kara Mehmed b. Mustafa, Osman b. Abdullah, Yusuf b. Bayram, Ali b. Abdullah.
|