|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 107 Hüküm no: 87 Orijinal metin no: [8b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yusuf b. Süleyman’ın Mehmed b. Derviş’in giyim eşyasını çalması
Mahmiye-i Kostantıniyye mahallâtından Topkapısı kurbunda Kürkçübaşı mahallesi sâkinlerinden Mehmed Bey b. Derviş el-cündî mahfil-i kazâda Yusuf b. Süleyman nâm kimesne mahzarında takrîr-i da‘vâ edip, târih-i kitâb günü mezbûr Yusuf benim evime girip üç yüz akçe kıymetli iki don ve iki gömleğim ahz etmişdir. Hattâ ba‘de’l-ahz ardınca vardıkda gömleğin birisin yolda düşürüp sâirleri hâlâ kendiden suâl olunup ihkāk-ı hak olunmasın taleb ederim dedikde, gıbbe’s-suâl ve akībi’l-inkâr ve’l-istişhâd udûl-i Müslimînden İbrahim Bey b. Yunus el-cündî ve Sefer b. Abdullah er-râcil ve Ömer b. Mehmed el-müsta‘id ve Murad b. Abdullah ve Ali b. Piyâle li ecli’ş-şehâde hâzırûn olup, fi’l-hakīka mezbûr Yusuf merkūm Mehmed Bey’in zikr olunan târih-i kitâb günü evine girip iki don ve iki gömleğin ahz etmişdir alıp giderken elinde gördük bu husûsa şâhidleriz şehâdet dahi ederiz deyû edâ-yı şehâdet-i şer‘iyye eylediklerinde, gıbbe’t-ta‘dîl şehâdetleri hayyiz-i kabûlde vâki‘ olmağın mâ hüve’l-vâki‘ gıbbe’t-taleb ketb olundu. Tahrîr fi’l-yevmi’s-sâmin ve’l-ışrîn min Saferi’l-hayr fi’t-târihi’l-mezbûr.
Şuhûdü’l-hâl: Ali b. Abdi el-muhzır, Murad b. Mehmed ve gayruhüm.
|