|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 110 Hüküm no: 95 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Divan kâtibi Mehmed b. Abdülmennân’ın ortak menzildeki hissesini teslim aldığı
Mahmiye-i İstanbul’da Defterdâr Mehmed Efendi mahallesinde sâkin olup Dîvân-ı Hümâyûn kâtiblerinden sâhibü’l-kitâb olan iftihârü’l-emâcid ve’l-a‘yân Mehmed Efendi b. Abdülmennân meclis-i şer‘-i kavîmde sevk-i kelâm edip, mahalle-i mezbûrda vâki‘ muhavvata-i dâhiliyyesi iki bâb tahtânî odaları ve iki sofa ve bir taş seddi ve bir matbah ve bir hamam ve iki taş sed nerdübânını ve hadîka ve iki tarafından taş havlu duvarını hâviye olup ve muhavvata-i hâriciyesi iki bâb fevkānî odaları ve altlarında ahırı ve fevkānîyye bir sofa ve bir gurfeyi muhtevîye olup, bir tarafından kendi mülküme ve bir tarafdan Mustafa b. Ali ve bir tarafdan Sâliha bt. Pervâne mülklerine ve bir tarafından tarîk-i âmma müntehî olan menzilin sülüsü benim mülk-i müşterâm olup ve sülüsânı Mehmed b. Ali nâm kimesnenin mülk-i mevrûsu olmağın, kıbel-i şer‘den üzerine varılıp kābil-i kısmet olmakla beynimizde alâ vechi’t-terâzi taksîm olunmak taleb ederim dedikde, savb-ı şer‘den Mevlânâ Mahmud Efendi irsâl olunup, hâssa mi‘mârlardan Üstâd Mustafa ve Üstâd Ali ve zeyl-i kitâbda esâmisi mastûr olan Müslimîn ile mahall-i mezbûra varıp, merkūm Mehmed’in husûs-ı mersûme vekîl-i şer‘îsi olan Osman [b.] Abdullah huzûrunda mi‘mârân-ı merkūmân mesâha ve takvîm ettiklerinde, menzil-i mezbûrun ebniye ve arsası yüz on üç bin üç yüz kırk akçeye takvîm olunup, mezbûr Mehmed Efendi’nin sülüs hisse-i memlûkesi için otuz yedi bin yedi yüz seksen akçelik arsa ve binâ lâzım geldikde muhavvata-i dâhiliyyesinde vâki‘ arsaları şatrancî hesâbı üzre yüz yirmi yedi zirâ‘ olup, beş bin iki yüz kırk akçeye takvîm olanları bir bâb tahtânî oda ve sofa ve yine hesâb-ı mezbûr üzre yirmi beş zirâ‘ olup iki bin akçe takvîm olunan taş seddi ve bin beş yüz akçe takvîm olunan bir taş nerdübân ve merkūm Mehmed Efendi’nin mülküne mülâsık hesâb-ı mezbûr üzre yüz yetmiş sekiz zirâ‘ olup beş bin üç yüz kırk akçeye takvîm olunan arsa-i hadîka ve yüz beş zirâ‘ olup altı bin üç yüz akçeye takvîm olunan bir taş havlu duvarı ve muhavvata-i hâriciyesinde mezbûr Mehmed Efendi mülküne muttasıl hesâb-ı mezbûr üzre seksen zirâ‘ arsası olup yedi bin dört yüz akçeye takvîm olunan bir bâb fevkānî oda ve altında ahırı cem‘an otuz yedi bin yedi yüz seksen akçelik ebniye ve arsa olup, vekâlete mezbûr Osman’ın rızâsıyla merkūm Mehmed Efendi’nin hisse-i memlûkesi için ta‘yîn ve kendiye teslîm olunup ve yine muhavvata-i dâhiliyyesinin vâki‘ on beş bin akçeye takvîm olunan bir bâb tahtânî oda ve sofa ve hesâb-ı mezbûr üzre yirmi beş zirâ‘ olup iki bin üç yüz akçeye takvîm olunan taş sed ve altı bin dört yüz akçeye mukavvem matbah ve oda iki bin kırk akçeye mukavvem hamam ve bin yedi yüz akçeye mukavvem bir taş nerdübân ve yine hesâb-ı mezbûr üzre altmış iki zirâ‘ olup bin sekiz yüz altmış akçeye takvîm olunan arsa-i hadîka ve yine doksan zirâ‘ olup beş bin dört yüz akçeye takvîm olunan taş duvar ve muhavvata-i hâriciyesinde vâki‘ yirmi altı bin sekiz yüz seksen akçeye takvîm olunan bir bâb fevkānî oda ve sofa ve dehliz ve üç bin akçeye takvîm olunan gurfe ki cem‘an yetmiş beş bin beş yüz altmış akçelik ebniye ve arsa olur. Alâ vechi’t-terâzi müvekkil-i mezbûrun sülüsân hisse-i irsiyyesi için ta‘yîn ve ba‘de’l-ikrâr vekîl-i mezbûra teslîm olunup ol dahi vekâleten tesellüm ettikden sonra mezbûr Mehmed Efendi ve vekîl-i mersûmdan her biri asâleten ve vekâleten âharın zimmetini husûs-ı merkūma müte‘allik olan cemî‘-i de‘âvî ve mütâlebâtdan ibrâ-i âm ibrâ eyledik dediklerini mevlânâ-yı mezbûr mahallinde tahrîr ve mahfil-i kazâda takrîr etmeğin, mâ hüve’l-vâki‘ ketb olundu. Tahrîren fi’l-yevmi’s-sâdis min şehri Rebî‘ilevvel li sene seb‘a ve ışrîn ve elf.
Şuhûdü’l-hâl: İbrahim Çelebi b. Hüsrev, Mahmud Bey b. Abdullah, Derviş Hasan b. Mahmud, Mustafa b. Turhan, Halil b. İbrahim el-cündî, Kenan Çavuş b. Abdullah, Mehmed b. Mustafa.
|