.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 112
Hüküm no: 97
Orijinal metin no: [9b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Halife b. Ali’ye, elinden alınan evin tamir masraflarının ödenmesi

Sâhibü’l-kitâb Mehmed Halife b. Ali mahfil-i kazâda zü’l-kadri’l-celî es-Seyyid Mehmed b. Ali mahzarında takrîr-i kelâm edip, bundan akdem mahmiye-i Kostantıniyye’de Hoca Hayreddin mahallesinde vâki‘ ma‘lûmü’l-hudûd menzili mülküm olmak üzre dört bin akçeye mezbûr es-Seyyid Mehmed bana bey‘ edip, ben dahi ibtiyâ‘ eylediğimden sonra menzil-i mezkûrûn ba‘zı mevâzi‘inde ta‘mîr etmişdim. Hâlâ menzil-i mezkûru Fâtıma Hâtun nâm sâhibetü’l-hayr vakf edip kirâsın sâdât-ı kirâma şart eyledikde, mezbûr es-Seyyid Mehmed muvâcehesinde isbât edip hâkimü’ş-şer‘ emri ile yedimden almağın savb-ı şer‘-i şerîf üzerine âdem gönderilip ta‘mîr ve binâ eylediğim ebniye keşf ve takvîmen kıymetinin mertebe-i tahammülü görülmesin taleb ederim dedikde, cânib-i şer‘-i kavîmden fahrü’l-müdakkikīn Ahmed Efendi b. el-merhûm Abdülhalîm Efendi irsâl olunup, ol dahi hâssa mi‘mârlardan Mustafa Çelebi b. Hüsam ve zeyl-i kitâbda isimleri mastûr olan Müslimîn ile menzil-i mezbûrun üzerine varıp nazar eylediklerinde, fi’l-vâki‘ cânib-i şarkīsinde vâki‘ taş duvarı ve duvar-ı mezbûr üzerinde bir dolma duvarı ve fevkānî iki evin ocakları ve kenîfi müceddeden binâ olunmuş bulunup, zikr olunan taş duvar mesâha olundukda, tûlen yedi ve arzan üç hesâb-ı şatrancî üzre yirmi bir zirâ‘ olup, üç buçuk zirâ‘ı duvar-ı mezbûrda merkūm Mehmed Halife açdığı iki pencerenin nısfına takas olunup, bâkīsi on yedi buçuk zirâ‘ın her zirâ‘ı kırkar akçeden yedi yüz akçe ve duvar-ı mezbûr üzerinde olan dolma duvar dahi mesâha olundukda, tûlen ve arzan bi hesâb-ı mezbûr altmış dokuz zirâ‘ olup, on iki zirâ‘ı yine duvar-ı mezbûrda açdığı iki pencerelerin nısfına takas olunup, bâkī elli yedi zirâ‘ kalıp zirâ‘ı on dokuz akçeden bin seksen bir akçe ve üç dolmadır ki otuz beşer akçeden yüz beş akçe ve biri makaslık ve biri tabanlık iki direğe elli akçe ve perdesinin on iki teneke tahtası olup onar akçeden yüz yirmi akçedir ve döşemesinin beş tahtası onar akçeden elli akçe ve iki ocağın herbirine üç yüzer akçeden altı yüz akçe ve kenîfin hafrına ve sâir levâzımına üç yüz akçe mevâzi‘-i mezbûrenin takvîmen kıymeti üç bin altı akçeye tahammülü olduğun mi‘mâr-ı mezbûr ve sâir ahâlî-i vukūf ve erbâb-ı ebniye ve sukūf tahmîn eylediklerinde, meblağ-ı merkūmu mezbûr Mehmed Halife’ye edâ etmek için mezbûr es-Seyyid Mehmed’e ve hâlâ kapı olan mevâzi‘i ke’l-evvel taş duvar binâ edip ve iki kıt‘a pencere üzerinde ve iki dolab ve bi’r-i mâ mezbûr Mehmed Halife dahi mezbûr es-Seyyid Mehmed’e teslîm etmek için tenbîh olunduğu, mevlânâ-yı mûmâ-ileyh mahallinde tahrîr ba‘dehû gelip mahfil-i kazâda inhâ vü takrîr etmeğin, mâ vaka‘a ba‘de’t-taleb ketb olundu. Hurrire fi’l-yevmi’l-hâmis ve’l-ışrîn min Saferi’l-hayr li sene seb‘a ve ışrîn ve elf.


Şuhûdü’l-hâl: Abdurrahman Efendi b. es-Seyyid Mehmed, Hasan Efendi el-hatîb, Mustafa b. Abdullah, Hasan Efendi el-müderris, Mehmed b. Hasan er-râcil, Halil b. Ahmed ve gayruhüm.