|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 113 Hüküm no: 98 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mahmud Çelebi’nin varislerinin anlaştığı
Mahmiye-i Kostantıniyye’de Çukurhamamı kurbunda sâkin iken vefât eden Mahmud Çelebi b. el-merhûm Mehmed Efendi nâm sagīrin verâseti vâlidesi Belkıs Hâtun bt. Abdullah ve li eb kız karındaşı Âbide’ye ve li ebeveyn ammi[si] mefhar-i kuzâti’l-İslâm Ali Efendi b. Sıyami’ye münhasıra idiği hâkim-i muvakki‘-i sadr-ı kitâb-ı tûbâ-leh [ve] hüsnü me’âb huzûrunda mütebeyyin olup, mezbûre Belkıs Hâtun’u mu‘arrefe-i şer‘iyye ile Hatice [bt.] Mehmed Efendi ve Ümmî bt. Ebûbekir nâm hâtunlar ta‘rîf ettikden sonra, mezbûre Belkıs Hâtun’un zevci ve tarafeynden husûs-ı âti’z-zikre vekîli olup Eşref Efendi b. Mehmed ve Mehmed b. Behrâm şehâdetleri ile hasm-ı şer‘-i câhid mahzarında vekâleti sâbit olan fahrü’l-kuzât Abdurrahman Efendi b. Nasrullah meclis-i şer‘de müteveffâ-yı mezbûr Mehmed Çelebi’nin ammî ve vârisi ve kıbel-i şer‘-i şerîfden mansûb vasîsi hâfızu’l-kitâb-ı mûmâ-ileyh Ali Efendi mahzarında bi’l-vekâle ikrâr ve takrîr-i kelâm edip, sagīr-i mezbûra bundan akdem vefât eden babası merhûm-ı mezbûr Mehmed Efendi’den intikāl edip ber-mûceb-i defter-i kassâm vasiyy-i müşârun-ileyh Ali Efendi yedinde mazbût olan hisse-i şer‘iyye-i ma‘lûmesinden ba‘de’l-vefât vâlidesi mezbûre Belkıs Hâtun’a âid olan yirmi yedi bin dörder yüz seksen altı akçeyi vekâlet-i mahkiyem hasebiyle bi’t-tamâm vasiyy-i mezbûr Ali Efendi yedinden alıp kabz etdim. Min ba‘d müteveffâ-yı mezbûr Mehmed Çelebi’nin babası muhallefâtından olup mahmiye-i mezbûrede Balat nâm mevzi‘de vâki‘ ma‘lûmü’l-hudûd bahçeye ve mahrûse-i Bursa hâricinde Çekirge hamamı kurbunda vâki‘ ma‘lûmü’l-hudûd menzile ve sâir muhallefâtına müte‘allik âmme-i de‘âvîden mezbûr Ali Efendi’nin zimmetin ibrâ-i âmm-ı kātı‘ü’n-nizâ‘la ibrâ ve ıskāt-ı tâm ile ıskāt etdim dedikde, mezbûr Abdurrahman Efendi’nin vekâleti hasebiyle sudûr eden ikrârın mûmâ-ileyh Ali Efendi asâleten ve vesâyeten tasdîk ve tahkīk etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min şehri Rebî‘ilevvel li sene seb‘a ve ışrîn ve elf.
Şuhûdü’l-hâl: Mehmed Efendi b. Musa, İsa Efendi b. ( ), eş-Şeyh Rahmet Efendi b. ( ), İsa Efendi, Davud Efendi ve gayruhüm.
|