|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 116 Hüküm no: 103 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Osman Beşe’nin alamadığı Koçhisar Tuzlası yasakçılığı için ödediği paranın iadesi
Dergâh-ı âlî yeniçerilerinden sâhibü’l-kitâb Osman Beşe b. İbrahim mahfil-i kazâda yeniçeri tâ’ifesinin gediklilerinden Süleyman Beşe b. Abdullah mahzarında takrîr-i da‘vâ edip, mezbûr Süleyman Beşe tâ’ife-i mezbûreden kethüdâ-yı sarrâcî olmakla, bin yirmi altı senesinde vilâyet-i Karaman’da Koçhisar Memlahası yasakçılığını bana der-uhde edip yedimden altı bin akçe alıp kabz edip, ben dahi varıp zabt etmek murâd eylediğimde şark seferinde olan yeniçeri ağası tarafından Süleyman Beşe b. Abdullah nâm mumcu gelip kuvvet-i kāhire ile zabt edip bana zabt müyesser olmayıp ve vech-i merkūm üzre zabt müyesser olmadığını nâtık sâbıkan Karaman beğlerbeğisi olan emîrü’l-ümerâ’i’l-kirâm Mehmed Paşa ve medîne-i Konya kadısı olan kıdvetü’l-ulemâ’i’l-fihâm Ramazan Efendi’den yedimde arzlar ve nâ’ibü’ş-şer‘ olan Mevlânâ Mehmed b. Necmeddin’den hüccet-i şer‘iyye vardır, meblağ-ı merkūmu taleb ederim deyû ibrâz edip nazar olundukda, mezbûr Osman Beşe’nin takrîr-i meşrûhuna mutâbık bulunup, mersûm Süleyman Beşe istintâk olundukda, cevâbında fi’l-vâki‘ vech-i sâbık üzre meblağ-ı merkūm altı bin akçeyi mezbûr Osman Beşe’den alıp kabz etdim, lâkin zikr olunan yasakçılığı sene-i merkūmede mezbûr Osman Beşe zabt eyledi deyip gıbbe’l-inkâr mezbûr Süleyman Beşe’den beyyine taleb olundukda ityân-ı beyyineden izhâr-ı acz edip istihlâf eylediğinde mezbûr Osman Beşe dahi alâ vefki’l-mes’ûl yemîn billâhi te‘âlâ etmeğin meblağ-ı merkūm altı bin akçenin edâsıyla mezbûr Süleyman Beşe’ye tenbîh olunup, mâ vaka‘a bi’t-taleb ketb olundu ve yed-i tâlibine def‘ olundu. Tahrîren fi’l-yevmi’l-hâdî li sene seb‘a ve ışrîn ve elf.
Şuhûdü’l-hâl: Abdi Beşe b. Ali, Ali Beşe b. Abdullah, el-Hâc Ali b. Abdullah.
|