.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 120
Hüküm no: 111
Orijinal metin no: [11a-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hurrem Çavuş Vakfı Mütevellisi Mahmud Çavuş’un selefi Osman Çelebi’nin vakıftan verdiği borçları kabûl ettiği

Mahmiye-i İstanbul’da merhûm Hurrem Çavuş vakfına bi’l-fi‘l mütevellî olan Mahmud Çavuş b. Ahmed meclis-i şer‘-i şerîfde, vakf-ı mezbûra mütevellî iken vefât eden Osman Çelebi b. Hızır’ın sulbiye kızları Fâtıma ve (...) vasiyy-i şer‘îleri ve vâlideleri olup müteveffâ-yı mezbûrun zevce-i metrûkesi olan Ümmühâni Hâtun bt. Mustafa tarafından ikrâr-ı âti’z-zikri tasdîka nehc-i şer‘î üzre vekâleti sâbite olan mefharü’l-kuzât Mustafa Efendi b. Mehmed muvâcehesinde ikrâr ve ta‘bîr ani’l-merâm edip, müteveffâ-yı mezbûr hâl-i hayâtında tevliyyeti hasebiyle asl-ı mâl-ı vakf-ı mezbûrdan yüz on sekiz bin iki yüz elli dört akçe kabz ve zimem-i nâsa tevzî‘ eylemişdi. El-hâletü hâzihî tevliyyet-i mezbûre bana tevcîh olunmağla zimem-i nâsda olan meblağ-ı merkūmu yerli yerinden görüp ve rehinlerini kabz eyleyip cümlesi makbûlüm olmuşdur. Min ba‘d asl-ı mâl-ı vakıfdan ve yevm-i vefâtına gelince makbûzu olan ribhinden müteveffâ-yı mersûm zimmetinde bir akçe ve bir habbe bâkī kalmadı dedikde, gıbbe’t-tasdîk mâ vaka‘a kayd şüd. Fi’t-târihi’l-mezbûr.Şuhûdü’l-hâl: Hasan Çelebi b. Mustafa el-müezzin, Mehmed b. Hasan, Mustafa b. Ali, Ali Bey b. Abdullah ve gayruhüm.