|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 119 Hüküm no: 110 Orijinal metin no: [11a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Râbia Hâtun’un Yusuf Ağa’ya değirmen, bostan ve harman yerini satıp, tarla ile çayırlarının kullanım hakkını devrettiği
Mahmiye-i İstanbul’da Yedikule hâricinde Makrihori nâm mahalle sâkinelerinden Râbia Hâtun bt. Ali tarafından husûs-ı âti’z-zikre vekîl olup, hasm-ı şer‘-i câhid mahzarında mezbûreyi ma‘rifet-i şer‘iyye ile ârifeyn olan Budak Subaşı b. Abdullah ve Hüseyin Bey b. Abdullah şehâdetleri ile şer‘an vekâleti sâbite olan Ahmed Bey b. Mustafa mahfil-i kazâda vilâyet-i Rumeli’nde medîne-i Sofya sâkinlerinden fahrü’l-a‘yân Yusuf Ağa b. Abdülmennân tarafından ikrâr-ı âti’l-beyânı tasdîka vekîl olup, bi mâ hüve tarîkü’s-sübût şer‘an vekâleti sâbite olan Ali Bey b. Yunus mahzarında takrîr-i kelâm edip, müvekkilem mezbûre Râbia Hâtun Sofya Kazâsına tâbi‘ Boyana nâm karyede vâki‘ bir tarafı Mehmed Çelebi mülkü ve bir tarafı Franko nâm zimmî mülkü ve bir tarafı Suluçorum nâm mevzi‘ ile mahdûd ma‘lûmü’l-hudûd olup Ferruh Ağa değirmeni demekle ma‘rûf olup Boyana Suyu üzerinde dâ’ir olan bir göz değirmen âmme-i levâhıkıyla karye-i mezbûre kurbunda vâki‘ bir tarafı İlya nâm zimmî mülkü ve bir tarafı Miyo nâm zimmî mülkü ve iki tarafı tarîk-i âm ile mahdûd olup, eşcâr-ı müsmireyi müştemil tahmînen iki dönüm mülk bostanlığı ve mülk harman yerini kâffe-i tarâyıkı ile mezbûr Yusuf Ağa[‘ya] bey‘-i bât ile yedi bin akçeye safka-i vâhide ile bey‘ edip kabz ettikden sonra karye-i mezbûre kurbunda vâki‘ her birinin hudûdu inde’l-ahâlî ma‘lûm olan on dört kıt‘a tarlaların ve dört kıt‘a çayırlığın hakk-ı tasarrufları sâhib-i arz ma‘rifetiyle tefvîz etdi, ol dahi tefevvüz ve kabûl ettikden sonra mukābele-i tefvîzde yedinden bin nakid akçe alıp emlâk-i mezbûreyi ve arâzî-i mesfûreyi mahallinde kabza müşterî-i mezbûru taslît etdi dedikde, gıbbe’t-tasdîki’ş-şer‘î mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-hâdî aşer min [şehri] Rebî‘ilevvel li sene seb‘a ve ışrîn ve elf.
Şuhûdü’l-hâl: Mehmed Çavuş, Mehmed Çavuş b. ( ), İsmail Ağa, Şahbaz b. Hasan.
|