.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 126
Hüküm no: 120
Orijinal metin no: [12b-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ünzile bt. Haydar’ın, Altun bt. Murad’a satmak için verdiği eşyaların bedelinin ödenmesi

Hacı Türk mahallesi sâkinelerinden Ünzile bt. Haydar nâm hâtun meclis-i şer‘-i şerîfde Altun bt. Murad nâm zimmîye muvâcehesinde üzerine da‘vâ edip, bundan akdem merkūme Altun’a yedi yüz akçe kıymetli bir yeşil dârâyî kaftan ve bin dört yüz akçe kıymetli bir al dârâyî kaftan ve dokuz yüz akçe kıymetli bürüncek gömlek ve yüz altmış akçe kıymetli kırk zirâ‘ bez bey‘ etmek için mezbûre Altun’a vermişdim. Hâlâ zikr olunan eşyâyı ve kıymetlerin vermede muhâlefet eder suâl olunup hakkım alıverilmesin taleb ederim dedikde, gıbbe’s-suâl merkūme Altun cevâbında, zikr olunan eşyâyı aldım lâkin müdde‘iyye-i mezbûrenin zimmetinde iki bin akçe hakkım olup deyni mukābelesinde vermişdir deyû i‘tirâf ettikde, mevcûdâtı zikr olunan esvâbı ihzârı müte‘azzir ise ba‘de’l-beyân kıymetlerin edâya tenbîh olundu, mâ vaka‘a ketb olundu. Tahrîr[en] fi[‘t-târihi’l] -mezbûr.


Şuhûdü’l-hâl: Mustafa b. Hasan, el-Hâc Veli b. Bayezid, Nasûh b. Yusuf, Hasan b Mehmed, Osman b. Abdullah.