|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 128 Hüküm no: 125 Orijinal metin no: [13a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Balçık Kazası emîni Yako v. İsak’ın Sinan Ağa b. Abdülmennân’a borçlu olduğu
Rumeli’nde bi’l-fi‘il Balçık Kazâsına ve tevâbi‘ine ber vech-i iltizâm emîn olan Yako v. İsak nâm Yahudi tarafından ikrâr-ı âti’z-zikre Mehmed b. Abdullah nâm nüvvâb-ı sultânî ve Mustafa b. Abdullah şehâdetleri ile şer‘an vekâleti sâbite olan Mordehay v. İlya nâm Yahudi meclis-i şer‘de, işbu hâfizü’l-kitâb aynü’l-a‘yân manzûrü’s-sudûr ve’l-erkân Sinan Ağa b. Abdülmennân taraf-ı karînü’ş-şereflerinden ikrâr-ı âti’l-beyânı tasdîka Mehmed b. Abdullah el-Bevvâbü’s-sultânî ve Murad b. el-Hâc Veli şehâdetleri ile şer‘an vekâleti sâbite olan Yanaki v. Dimitri nâm zimmî muvâcehesinde ikrâr ve takrîr-i kelâm edip, cihet-i karzdan mûmâ-ileyh Sinan Ağa’ya altmış [yedi] bin akçe ve târih-i kitâb gününden yüz gün tamamına değin müeccel beynimizde ilm-i şer‘le ma‘lûm çuka-bahâsından dahi üç bin akçe cem‘an yetmiş bin akçe lâzımü’l-edâ ve vâcibü’l-kazâ deynim vardır deyû müvekkilim merkūm Yako i‘tirâf eyledi dedikde, mukırr-ı mezbûr Mordehay’ın vech-i meşrûh üzre ikrârını mezbûr Yanaki vekâleti hasebiyle tasdîk edicek, mâ hüve’l-vâki‘ bi’t-taleb ketb. Tahrîren fi’l-yevmi’s-sâdis aşer min şehri Rebî‘ilevvel li sene seb‘a ve ışrîn ve elf.
Şuhûdü’l-hâl: Hasan Çavuş b. Hüseyin, Ramazan b. Abdullah, Mehmed Bey b. Abdullah, İbrahim Bey b. Abdullah.
|