.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 135
Hüküm no: 135
Orijinal metin no: [14b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hüseyin Bey vakfının satılan harap evi yerine yeni evin alındığı

Mahmiye-i İstanbul’da merhûm Hüseyin Bey vakfına bi’l-fi‘il mütevellî olan Hüseyin Bey b. Pîrî meclis-i şer‘-i kavîmde sâhib-i hâze’l-kitâb Haseki ağası olan iftihârü’l-emâcid Ali Ağa b. Ahmed tarafından ve tasdîk-i âti’l-beyâna vekîl olup Abdülbâkī b. Mahmud Beşe b. Haydar şehâdetleriyle şer‘an vekâleti sâbit olan Abdullah Efendi b. Muharrem el-imâm muvâcehesinde ikrâr ve takrîr-i kelâm edip, vakf-ı mezbûrdan olup mahmiye-i mezbûre Tahtaminâre mahallesinde vâki‘ bir tarafı Selçuk Sultan Vakfı ve bir tarafı Celeb Kamer Hâtun Vakfı ve iki tarafı tarîk-i âm ile mahdûd olan menzil bi’l-külliye harâbe müşrif olup kābil-i süknâ olmamağın, müceddeden binâya vakf-ı mezbûrun mâlı dahi olmamağın, izn-i şer‘le noksana bey‘ olunup akçesiyle menâzil-i mezbûre bedel bir ma‘mûr menzil alınmak her vechile vakfa enfa‘ ve evlâ olmakla, menzil-i mezbûrun noksanla tevliyyet-i mahkiyem hasebiyle izn-i şer‘le yirmi bir bin akçeye mûmâ-ileyh Ali Ağa’ya bey‘ edip, meblağ-ı mesfûrun on beş bin akçesiyle Uzun Yusuf mahallesinde vâki‘ olup bir tarafı Mahmud Çavuş mülkü ve bir tarafı Mısırlı Mustafa Çavuş mülkü ve bir tarafı Abdülmaruf b. ( ) mülkü ve bir tarafı tarîk-i âm ile mahdûd olup bir bâb süflâ evi ve bir su kuyusunu ve eşcâr-ı müsmireyi ve havluyu müştemil olan menzili mâlından vakf-ı mezbûr için iştirâ edip, bâkī kalan altı bin akçeyi hâlâ benim yedimdedir. Ba‘de’l-yevm harâb menzil-i mezbûrun arzının her sene tamamında yüz elli akçe mukāta‘asın mûmâ-ileyh Ali Ağa cânib-i vakfa edâ edip, menzil-i mezbûra keyfe mâ yeşâ mutasarrıf ola dedikde, mütevellî-i mezbûrun ikrâr-ı meşrûhunu vekîl-i merkūm Abdullah Efendi vicâhen tasdîk ve şifâhen tahkīk edicek, mâ hüve’l-vâki‘ gıbbe’t-taleb ketb ve yed-i tâlibine def‘ olundu. Tahrîren fî evâhiri şehri Rebî‘ilevvel li sene seb‘a ve ışrîn ve elf.


Şuhûdü’l-hâl: İsmail Çavuş [b.] Abdullah, Osman Çavuş [b.] Mustafa Çavuş, Mehmed b. el-Hâc Ali Efendi, Şaban Ağa [b.] Abdullah, Ramazan Bâşe [b.] Murad, el-Hâc Ali [b.] Abdullah, Abdi Çelebi er-râcil ve gayruhüm.