|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 137 Hüküm no: 138 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Abdullah’ın çocuk düşürmesine sebep olan Piyâle b. Abdullah ile anlaştığı
Mahmiye-i İstanbul’da Ali Paşa mahallesi sâkinelerinden Fâtıma bt. Abdullah nâm hâtun tarafından husûs-ı âti’z-zikre Abdurrahman b. Süleyman ve Halil b. İbrahim şehâdetleriyle vekâleti sâbite olan zevci Mehmed b. Abdullah meclis-i şer‘-i şerîfde sâhib-i hâze’l-kitâb Piyâle b. Abdullah muvâcehesinde bi’l-vekâle ikrâr ve takrîr-i kelâm edip, bundan akdem mezbûr Piyâle müvekkilem mezbûre Fâtıma’yı darb edip onun darbı sebebiyle ilkā-i cenîn etti deyû merkūm Piyâle’den da‘vâ edip, ol dahi benden bi tarîki’l-karz iki bin beş yüz akçe da‘vâ etmişdi. El-hâletü hâzihî mezbûr Piyâle meblağ-ı mezbûr da‘vâsından ferâğ edip birbirimizin zimmetlerini ibrâ-i âm ile ibrâ ve ıskāt-ı tâm ile ıskāt ettik. Ba‘de’l-yevm zikr olunan husûsa müte‘allik her birimizden asâleten ve vekâleten da‘vâ sâdır olursa, lede’l-hükkâm mesmû‘a olmaya dedikde, vekîl-i mezbûr Mehmed’in ikrâr-ı meşrûhunu mukarrun leh-i mezbûr Piyâle vicâhen tasdîk ve tahkīk edicek, mâ hüve’l-vâki‘ gıbbe’t-taleb ketb olundu. Fi’t-târihi’l-mezbûr.
Şuhûdü’l-hâl: Ahmed b. Şahbaz, Mustafa b. Hamza, Mustafa b. Mehmed, Mustafa b. Yusuf, Yusuf [b.] Bayram, İbrahim [b.] Receb, Eyüb b. Mehmed ve gayruhüm.
|