|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 137 Hüküm no: 139 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mustafa b. Receb’in satmak üzre Fâtıma Hâtun’a teslim ettiği câriye bedelinin ödenmesi
Mahmiye-i İstanbul sâkinlerinden sâhibü’l-kitâb Mustafa b. Receb meclis-i şer‘-i kavîmde Fâtıma Hâtun bt. Mehmed mahzarında takrîr-i da‘vâ edip, bundan akdem on sekiz bin akçeye bey‘ ediver deyû merkūm Fâtıma Hâtun’a Macariyye Kamran bt. Abdullah nâm câriye-i memlûkemi teslîm etmiş idim, hâlâ taleb ederim dedikde, gıbbe’s-suâl mezbûre Fâtıma Hâtun cevâbında, fi’l-hakīka mezbûr Mustafa câriye-i merkūmeyi meblağ-ı merkūma bey‘ ediver deyû bana teslîm edip, ben dahi tesellüm ettiğimden sonra on altı bin akçeye bey‘ ve semenini kabz eyleyip kendi mesârifime sarf eyledim deyicek, mezbûre Fâtıma Hâtun’un ikrârı mûcebince zimmetine lâzım olan meblağın edâsına tenbîh olunup, mâ hüve’l-vâki‘ gıbbe’t-taleb ketb olundu. Tahrîren fî evâhiri şehri Rebî‘ilevvel li sene seb‘a ve ışrîn ve elf.
Şuhûdü’l-hâl: El-Hâc Bayezid b. Veli, Nasûh b. Yusuf, Hasan b. Pîrî ve gayruhüm.
|