.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 139
Hüküm no: 141
Orijinal metin no: [15a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Paşa’nın kızı Belkıs Hâtun’un satın aldığı câriyenin hastalıklı çıktığı

Mahmiye-i İstanbul’da Muhtesib Karagöz mahallesi sâkinelerinden fahrü’l-muhadderât tâcü’l-mestûrât Belkıs Hanım bt. el-merhûm Ahmed Paşa tarafından husûs-ı âti’l-beyâna vekîl olup mezbûre Belkıs Hanım’ı ma‘rifet-i şer‘iyye ile ârifeyn olan es-Seyyid Abdülkādir b. es-Seyyid Mehmed ve Behrâm b. Abdullah şehâdetleri ile şer‘an vekâleti sâbite olan fahrü’l-müderrisîn Hamdi Efendi b. Mehmed mahfil-i kazâda fahrü’l-emâcid ve’l-a‘yân Mustafa Ağa b. Abdi tarafından husûs-ı âti’l-beyâna vekîl olup, Mehmed Bey b. Mehmed el-cündî ve Hızır Beşe b. Abdullah şehâdetleri ile şer‘an vekâleti sâbite olan Nuh Bey b. Musa mahzarında takrîr-i kelâm edip, bundan akdem müvekkilem mezbûre Belkıs Hanım merkūm Mustafa Ağa’dan on altı bin akçeye iştirâ ettiği açık kaşlı elâ gözlü ak benizli dellâke Çerkeziyye hâzıra bi’l-meclis olan Cihân-efrûz bt. Abdullah sıraca demekle ma‘rûf maraza mübtelâ olup, şer‘an redd i‘câb eder ayb-ı kadîm olmağın red olunup semeni alıverilmek taleb ederim dedikde, gıbbe’s-suâl vekîl-i mezbûr Nuh Bey cevâbında, fi’l-hakīka câriye-i mezbûre hâlâ maraz-ı mezbûra mübtelâtdır, lâkin bâyi‘-i mezbûr yedinde mevcûd idiği ma‘lûmum değildir deyicek, vekîl-i mezbûr Hamdi Efendi’den da‘vâsına mutâbık beyyine taleb olundukda udûl-i Müslimînden Mehmed b. Ali ve Behrâm b. Abdullah mahfil-i kazâya li ecli’ş-şehâde hâzırân olup, fi’l-hakīka câriye-i mezbûrede maraz-ı mezbûr kable’l-bey‘ yed-i bâyi‘de mevcûd olup ayb-ı merkūm ile mu‘ayyebe idi. Bu husûsa şâhitleriz şehâdet dahi ederiz deyû şehâdet-i şer‘iyye ettiklerinde, ba‘de’t-ta‘dîl ve’t-tezkiye şehâdetleri makbûle olmağın mûcebiyle hükm olundu. Mâ hüve’l-vâki‘ ketb olunup yed-i tâlibine def‘ olundu. Tahrîren fî evâsıtı şehri Rebî‘ilevvel [li sene seb‘a ve ışrîn ve elf.]


Şuhûdü’l-hâl: Halil Bey b. Emirhan, eş-Şeyh Mehmed Çelebi, Mustafa Beşe b. Abdullah, Murad b. Mehmed.