.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 138
Hüküm no: 140
Orijinal metin no: [15a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa Beşe b. Hüsrev’in Mustafa Paşa’da mukâtaa bedelinden olan alacağının tahsil edilmesi

Mahmiye-i İstanbul’da Hoca Paşa mahallesi sükkânından Mehmed b. Ali meclis-i şer‘-i kavîmde, düstûr-ı mükerrem müşîr-i müfahham nâzım-ı menâzımü’l-âlem müdebbir-i umûr-ı cumhûri’l-ümem el-mahfûf bi sunûfi avâtıfi’l-meliki’l-a‘lâ hazreti Mustafa Paşa -yesserallâhu fi’d-dâreyn mâ yeşâ- taraf-ı karînü’ş-şereflerinden husûs-ı âti’z-zikre nehc-i şer‘î üzre vekâleti sâbite olan vekîl-i harcları el-Hâc İbrahim b. Hasan muvâcehesinde ta‘bîr ani’l-merâm edip, bundan esbak müşârun-ileyh hazretleri kendi hâslarından vilâyet-i Anadolu’da Nif Kazâsına tâbi‘ Kızılcalı nâm karye ve tevâbi‘i mukāta‘asını bin yirmi yedi senesinde vâki‘ Mart ibtidâsından bir sene tamamına değin kasaba-i Nif sükkânından Mustafa Beşe b. Hüsrev nâm râcile yüz on bin akçeye der-uhde edip, meblağ-ı merkūmun otuz bin akçesini ber vech-i peşin mezbûrun yedinden ahz eylemişdi. El-hâletü hâzihî matbah-ı sultânî mühimmâtı için taraf-ı mîrîden zabt olunup mukāta‘a-i merkūmûnun zabtı merkūm Mustafa Beşe’ye müyesser olmamağın, meblağ-ı merkūm otuz bin akçeyi müvekkil-i müşârun-ileyhden taleb ve kabz ve îsâle beni vekîl eylemişdir, vekâletim hasebiyle taleb ederim dedikde, gıbbe’s-suâl vekîl-i merkūm el-Hâc İbrahim cevâbında, fi’l-hakīka hâl zikr olunan minvâl üzre olmuşdur, lâkin mezbûr Mustafa Beşe merkūm Mehmed’i vech-i muharrer üzre vekîl ettiğini bilmezim deyicek, mersûm Mehmed’den sıdk-ı makāline beyyine taleb olundukda udûl-i Müslimînden olup mahmiye-i mezbûrede Tahtakale kurbunda Demirtaş mahallesinde sâkin olan el-Hâc Mustafa b. Yusuf ve yine mahmiye-i mezbûrede Şîrmerd Hanı kurbunda börekçi olan Mehmed b. Ali mahfil-i kazâya li ecli’ş-şehâde hâzırân olup, fi’l-hakīka mezbûr Mustafa Beşe husûs-ı merkūm için müşârun-ileyh paşa hazretlerine teslîm eylediği meblağ-ı mersûm otuz bin akçeyi taleb ve kabz ve îsâle ve kabz ve îsâl mütevakkıf olduğu umûrun küllîsine kendi tarafından mezbûr Mehmed’i vekîl nasb edip, ol dahi kabûl eyledi. Bu husûsa şâhidleriz şehâdet dahi ederiz deyû edâ-yı şehâdet-i şer‘iyye ettiklerinde, ba‘de’t-ta‘dîl şehâdetleri makbûle olup mûcebiyle hükm olundukdan sonra, mâ hüve’l-vâki‘ bi’t-taleb ketb olundu. Fi’t-târihi’l-mezbûr.


Şuhûdü’l-hâl: Hasan b. Halil, Pîrî b. Nasûh, Hüseyin b. Dede, Pîrî b. Yusuf ve gayruhüm.