|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 142 Hüküm no: 148 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kâtib Bâli mescidi vakfı eski mütevellisi Mustafa Bey’in zimmetindeki kalan paranın tahsili
Mahmiye-i İstanbul’da Kâtib Bâli Mescid-i şerîfi Evkāfı’na ve mescid-i mezbûr mahallesi avârızına mevkūf olan nukūda bi’l-fi‘il mütevellî olan Ali Subaşı b. Abdullah meclis-i şer‘-i şerîfde Mustafa Bey b. ( ) mahzarında üzerine da‘vâ edip, bundan akdem mezbûr Mustafa Bey vakfeyn-i mezbûreyne mütevellî oldukda, mukaddemâ mütevellî olan Hüseyin nâm kimesne yedinden mescid-i merkūm vakfı olan mâldan kırk yedi bin yüz akçe ve yine mahalle-i mezbûre avârızı için vakf olan mâldan dahi yedi bin akçe, cem‘an elli dört bin yüz akçe ahz u kabz eylemişdi. Hâlâ tevliyyetim hasebiyle meblağ-ı merkūmu taleb ederim dedikde, gıbbe’s-suâl mezbûr Mustafa Bey cevâbında, vakfeyn-i mezbûreyne mütevellî olduğumda mütevellî-i sâbık-ı mezbûr Hüseyin yedinden mescid-i merkūm vakfından kırk bin dört yüz akçe ve avârız akçesinden dahi iki bin akçe, cem‘an kırk iki bin dört yüz akçe ahz u kabz etdim, ziyâde kabz etmedim deyicek, müdde‘î-i mezbûrdan sıdk-ı makāline beyyine taleb olundukda, udûl-i Müslimînden mefharü’l-a‘yân İbrahim Ağa b. Abdülmennân ez-Zevvâku’s-Sultânî ve Hüseyin Çavuş b. Abdullah mahfil-i kazâda li ecli’ş-şehâde hâzırân olup, fi’l-hakīka mezbûr Mustafa Bey tevliyyeti hasebiyle mukaddemâ mütevellî olan merkūm Hüseyin yedinden vakf-ı mescid-i mezbûr mâlından kırk yedi bin yüz akçe ve zikr olunan avârız akçesinden dahi yedi bin akçe ahz edip vakfeyn-i mezbûreyn mâlından cem‘an elli dört bin yüz akçe makbûzu olmuşdu. Bu minvâl üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde, ba‘de’t-ta‘dîli’ş-şer‘î şehâdetleri makbûle olup mûcebiyle hükm olundukdan sonra, mâ vaka‘a gıbbe’t-taleb ketb olundu. Tahrîren fî evâhiri şehri Rebî‘ilevvel li sene seb‘a ve ışrîn ve elf.
Şuhûdü’l-hâl: Fahrü’l-emâcid ve’l-a‘yân Pervâne Ağa b. Abdurrahman, Ömer Ağa b. Hüseyin Atcıbaşı, Habib Halife b. Mustafa el-imâm, Ali b. Abdullah, Receb b. Bâli, Ramazan Çavuş.
|