|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 143 Hüküm no: 149 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mustafa Çelebi’nin b. Mehmed’in Mustafa Beşe’ye açtığı alacak davasında haksız olduğu
Mahrûse-i Galata’da kasaba-i Kasımpaşa sâkinlerinden Mustafa Çelebi b. Mehmed meclis-i şer‘de Mustafa Beşe b. el-Hâc Veli mahzarında takrîr-i kelâm edip, mezbûr Mustafa Beşe bundan akdem bi gayri vech-i şer‘î dört bin dokuz yüz yetmiş iki akçem ahz u kabz etti, suâl olunup şer‘le alıverilmek taleb ederim dedikde, gıbbe’s-suâl mezbûr Mustafa Beşe cevâbında, müdde‘î-i mezbûra ben mukaddemâ her vakıyyesi on yedişer akçeye olmak üzre iki yüz doksan iki buçuk vakıyye sâde yağı bey‘ edip, ol dahi vech-i muharrer üzre iştirâ ve kabûl ettikden sonra, zikr olunan yağ ahz u kabz için dükkânında tezgâhtarı olan Mihayil v. Manol nâm zimmîyi irsâl edip, ben dahi zimmî-i mezbûra teslîm eyledikden sonra semeni olan meblağ-ı mezbûru taleb ettiğimde, mezbûr Mustafa Çelebi nizâ‘ edip bin yirmi dört senesi Şevvâli’nin evâhirinde mahmiye-i İstanbul’da hilâfete müvellâ olan fahrü’l-müderrisîni’l-kirâm Mevlânâ İbrahim Efendi b. Hayreddin huzûrunda murâfa‘a olduğumuzda, mezbûr Mustafa Çelebi husûs-ı mezbûru ikrâr etmeğin, meblağ-ı mezbûru bana teslîm etmek için mezkûra tenbîh-i şer‘î kılınmışdı. Mezbûrdan ahz ettiğim akçe-i mezbûr bey‘ ettiğim yağın semenidir deyû târih-i mezbûr ile müverraha ve mevlânâ-yı mezbûrun imzâsıyla mümzât ve hâtem ile mahtûme hüccet-i şer‘iyye ibrâz edip, müdde‘î-i mezbûr muvâcehesinde kırâ’at olundukda, mezbûr Mustafa Çelebi mazmûn-ı hücceti bi tav‘ihî mu‘terif olmağın mu‘ârazadan men‘ olunup, mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-hâmis ve’l-ışrîn min şehri Rebî‘ilevvel li sene seb‘a ve ışrîn ve elf.
Şuhûdü’l-hâl: Çukadâr Mustafa Beşe, Mehmed Çelebi b. Mustafa, Mustafa b. Cafer, Abdülcelîl b. Hüdâverdi ve gayruhüm.
|