|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 144 Hüküm no: 151 Orijinal metin no: [16a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Dimitri v. Yani’nin Yorgi v. Yani’den haksız yere para aldığı
Sâhibü’l-kitâb Yorgi v. Yani nâm zimmî mahfil-i kazâda Dimitri v. Yani nâm zimmî mahzarında üzerine da‘vâ edip, bundan akdem merkūm Dimitri beni Balıkpazarı’nda yasakçılara ahz ettirip, sende iki bin üç yüz akçe hakkım vardır deyû fuzûlen mezbûra kat‘â vereceğim yoğiken benden iki bin üç yüz akçem hilâf-ı [şer‘] ahz eyledi, suâl olunup meblağ-ı mersûm alıverilmesin taleb ederim dedikde, gıbbe’s-suâl ve akībü’l-inkâr müdde‘î-i mersûmdan da‘vâsına muvâfıka beyyine taleb olundukda, İsterlu v. Yorgi ve İsteryani v. Yani nâm zimmîler li ecli’ş-şehâde meclis-i şer‘a hâzırân olup istişhâd olundukda, fi’l-hakīka merkūm Dimitri müdde‘î-i mezbûr Yorgi’yi Balıkpazarı yasakçılarına ahz ettirip, mezbûrdan iki bin üç yüz akçem vardır deyip fuzûlen huzûrumuzda iki bin üç yüz akçesini [ahz] eyledi. Bu husûsa şâhidleriz şehâdet dahi ederiz deyû edâ-i şehâdet-i şer‘iyye edip, şehâdetleri hayyiz-i kabûlde vâkı‘a oldukdan sonra meblağ-ı merkūmun edâsına tenbîh birle, mâ vaka‘a kayd olundu.
Şuhûdü’l-hâl: Murad b. Mehmed, Halil b. İbrahim, İshak b. Bâli.
|