İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 145 Hüküm no: 153 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne balıkçılık kethüdâlığını iltizâma alan Yorgaki’nin kethüdâlık süresinin belirlenmesi Atebe-i aliyyemde istihdâm olunan bâkī kullarından olup husûs-ı âti’z-zikre me’mûr olan fahrü’l-akrân Mehmed Bey b. Ahmed meclis-i şer‘de Yorgaki v. Kosta muvâcehesinde üzerine da‘vâ edip, merkūm Yorgaki mahrûse-i Edirne’de Balıkçılık kethüdâlığını bin yirmi üç senesi Saferü’l-muzafferi’nde her sene altışar bin akçeye iltizâm edip, târih-i kitâba gelince zabt etmekle hesâb-ı mezbûr üzre mukırr-ı mezbûrun kıst-ı mîrî için taleb ederim dedikde, gıbbe’s-suâl merkūm Yorgaki cevâbında, fi’l-vâki‘ zikr olunan kethüdâlığı târih-i merkūmda vech-i mersûm üzre iltizâm edip on bir gün zabt etmiş iken, işbu meclisde hâzır olan Yani v. Manol nâm zimmî emr-i şerîf ile benim yedimden alıp, bu ana gelince zabt eylemişdir. Benim ancak on gün zabtım vardır demeğin, vâki‘ hâl merkūm Yani’den suâl olundukda, fi’l-vâki‘ zikr olunan kethüdâlığı merkūm Yorgaki on bir gün zabt ettikden sonra emr-i pâdişâhî ile ben dahi alıp altı ay zabt eyledim, lâkin iltizâm tarîkiyle zabt etmedim dedikde, mâ vaka‘a kayd şüd. Fi’l-yevmi’s-sâdis ve’l-ışrîn min şehri Rebî‘ilevvel li sene seb‘a [ve ışrîn ve elf.] Şuhûdü’l-hâl: Piyâle Bey b. Abdullah el-cündî, Murad b. Mehmed, Mehmed b. Ahmed, Mehmed b. ( ), Mustafa b. Hızır.