İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 145 Hüküm no: 154 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zabye bt. Harez’in Kadı Alâaddin Efendi Vakfı’na bey‘ bi’l-istiğlâl sûretiyle sattığı evini borcunu ödeyerek geri alması Mahmiye-i İstanbul’da vâki‘ merhûm Kadı Alâaddin Efendi vakfına bi’l-fi‘il mütevellî olan Sefer Çelebi b. Bâli meclis-i şer‘-i şerîfde, Cebealikapısı kurbunda vâki‘ Seferikoz mahallesi sâkinelerinden sâhibetü’l-kitâb Zabye bt. Harez nâm nasrâniyye tarafından tasdîk-i âtîye vekîl olup, mezbûru mu‘arrefe-i şer‘iyye ile ârifeyn olan Derviş Çelebi b. Emrullah ve Piyâle b. Abdullah şehâdetleri ile hasm-ı câhid mahzarında vekâleti sâbite olan Yanaki v. Harez nâm zimmî mahzarında ikrâr ve takrîr-i kelâm edip, bundan esbak müvekkile-i merkūme Zabye vakf-ı mezbûr mâlından yirmi iki bin akçe alıp kabz edip, mukābelesinde mahalle-i merkūmede vâki‘ bir tarafı Andriye v. Hazbe mülküne ve bir tarafı sicin ve bir tarafı tarîk-i âm ve taraf-ı râbi‘i Kokona v. Mihal mülküne müntehî olan mülk menzilini bi tarîki’l-istiğlâl taraf-ı vakfa bey‘ edip, ba‘de’t-tahliyyeti’ş-şer‘iyye yılda üç bin üç yüz akçe ücret ile istîcâr etmişdi. El-hâletü hâzihî meblağ-ı merkūm yirmi iki bin akçe asl-ı mâlı ve târih-i kitâba gelinceye bir yıl iki aylık ücret-i menzil evvelâ üç bin sekiz yüz elli akçeyi mezbûre Zabye yedinden bi’t-tamâm alıp, tevliyyetim hasebiyle vakf için kabz edip asl-ı mâl-ı mezbûr ve ücret-i menzil-i mezkûrdan zimmeti berî olup, beynimizde cârî olan akd-i icâremi fesh eyledim dedikde, mütevellî-i mezbûru ikrâr-ı meşrûhunda mezbûr Yanaki vekâlet-i mahkiyesi hasebiyle vicâhen tasdîk ve şifâhen tahkīk etmeğin, mâ hüve’l-vâki‘ gıbbe’t-taleb ketb olundu ve tahrîr ve yed-i tâlibine def‘ ve teslîm olundu. Tahrîren fi’l-yevmi’l-hâmis ve’l-ışrîn min şehri Rebî‘ilevvel li sene seb‘a ve ışrîn ve elf. Şuhûdü’l-hâl: Fahrü’l-cüyûş Abdi Çavuş, Bayezid b. Abdi, Hüseyin b. Seyyid Ahmed, Mehmed b. Bayram, Ali b. Abdullah, Davud b. Hızır, Piyâle b. Abdülmennân, el-Hâc Mehmed b. İsmail ve gayruhüm.