İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 148 Hüküm no: 158 Orijinal metin no: [17a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap Manol v. Yorgi’nin satın aldığı koyunların parasını ödemesi Rumeli’nde Sofya Kazâsından olup şirket-i vücûh tarîki üzre şerîkler olan Andanyo v. İsteryani ve Pero v. Miho ve Dimo v. Kosta ve Niko v. Nikola ve Yuvapa v. Niko ve Veko v. Yovan ve Nikola v. İsteryano nâm zimmîler meclis-i şer‘-i şerîfde Kasab tâ’ifesinden Manol v. Yorgi nâm zimmî mahzarında üzerine da‘vâ edip, bundan akdem şirket-i mezbûr ile şerîk olup mülküm olan her re’s yüz on yedişer akçe hesâbı üzre yüz seksen re’s koyunu ve yine her re’s yüz üçer akçe hesâbı üzre beş yüz yetmiş altı re’s koyunu, cem‘an seksen bin üç yüz seksen sekiz akçeye mezbûr Manol’a bey‘ ve teslîm edip, ol dahi tesellüm eyledikden sonra semen-i merkūmdan sekiz bin akçesin yedinden alıp kabz edip zimmetinde yetmiş iki bin üç yüz seksen sekiz akçe hakkımız kalmışdır, taleb ederiz dediklerinde, gıbbe’s-suâl mezbûr Manol husûs-ı mezkûru bi’l-külliye inkâr edip, gıbbe’l-istişhâd Köstendil Kazâsı ahâlîsinden İsteryano v. Pedilo ve Niko v. İsteryani ve Avram v. Gürci ve İstepo v. Lazari nâm zimmîler mahfil-i kazâya li ecli’ş-şehâde hâzırûn olup istişhâd olunduklarında, fi’l-vâki‘ bundan esbak her re’si yüz on yedişer akçe hesâbı üzre yüz seksen re’s koyunu ve yine her re’si yüz üçer akçe hesâbı üzre beş yüz yetmiş altı re’s koyunu, cem‘an seksen bin üç yüz seksen sekiz akçeye şürekâ-i mezbûreden zimmîler bizim huzûrumuzda mezbûr Manol’a bey‘ ve teslîm edip, ol dahi vech-i merkūm üzre ibtiyâ‘ ve tesellüm etdi. Biz bu husûsa minvâl-i meşrûh üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde, mezbûrların gıbbe’t-tezkiye şehâdetleri makbûle olup, mûcebi ile meblağ-ı merkūm yetmiş iki bin üç yüz seksen sekiz akçenin edâsına hükm olundu. Mâ vaka‘a gıbbe’t-taleb ketb ü tahrîr olunup tâlibi yedine def‘ olundu. Tahrîr fi’l-yevmi’s-sâbi‘ ve’l-ışrîn min şehri Rebî‘ilevvel li sene seb‘a ve ışrîn ve elf. Şuhûdü’l-hâl: ( )