.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 149
Hüküm no: 159
Orijinal metin no: [17a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölen bozacı Bilal v. Dika’nın terekesinin varislerine teslim edildiği

Mahmiye-i İstanbul’da Manisalı Çelebi mahallesinde bozacı iken hâlik olan Bilal v. Dika nâm zimmînin li ebeveyn karındaşları ve bi’l-inhisâr vârisleri olan Marko ve Dimo nâm zimmîler mahfil-i kazâda, hâlâ beytü’l-mâl-i âmme emîni olan Murad Ağa b. Abdürrahim tarafından husûs-ı âti’z-zikre vekîl olup, bi mâ hüve tarîkü’s-sübût şer‘an vekâleti sâbite olan Mustafa Bey b. İbrahim mahzarında takrîr-i kelâm edip, mûrisimiz mezbûr Bilal hâlik oldukda biz yanında mevcûd olmamağla, muhallefâtından emîn-i mezbûr on keyl darı ve on çeki odun ve beynimizde ba‘zı hurda esbâb ahz etmişdi. Hâlâ biz verâsetimiz sübût-ı şer‘î ile isbât etmeğin, emîn-i mezbûrun kabz ettiği esbâbı bi’t-tamâm ahz u kabz etdik, yedinde bir habbe bâkī kalmadı dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî [yevmi’t-]tâsi‘ ve’l-ışrîn min [şehri] Rebî‘ilevvel li sene seb‘a ve ışrîn ve elf.


Şuhûdü’l-hâl: Hızır b. Mürüvvet el-imâm, Abdülkerim b. Zülfikar, el-Hâc Mehmed b. Mustafa, Üstâd Ali ve gayruhüm.