İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 150 Hüküm no: 161 Orijinal metin no: [17a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İki İngiliz tacirinin kumaş ticareti yaptığı Avram ve oğullarındaki alacağının kefâlete bağlandığı İngiltere tâcirlerinden Cuvan v. İsmit nâm müste’men kendi tarafından asâleten ve Duvardo v. İsterine nâm zimmî tarafından husûs-ı âti’z-zikre Avraham v. Yasef ve Nesim v. Baruh nâm tercüman Yahudiler şehâdetleriyle şer‘an vekâleti sâbite oldukdan sonra vekâleten meclis-i şer‘de, mahmiye-i İstanbul’da Balat nâm mahalde sâkin Çite? cemâ‘atinden Avraham v. Mosi ve sulbî oğulları Hayim ve Yasef nâm Yahudiler muvâcehelerinde ikrâr ve ta‘bîr ani’l-merâm edip, beynimizde ilm-i şer‘î ile ma‘lûm çuka-bahâsından merkūm Yahudiler zimmetlerinde yüz yirmi üç bin dört yüz yirmi beş akçe hakkım olup, meblağ-ı merkūmun kırk beş bin akçesi mukābelesinde bana bir sandık ile beynimizde cinsi ve mikdârı ma‘lûm elbise ve mefrûşât verip, ben dahi asâleten ve vekâleten alıp kabz eyleyip, yetmiş sekiz bin dört yüz yirmi beş akçesi bâkī kaldıkda, târih-i kitâbdan iki yüz kırk gün mürûrundan sonra meblağ-ı bâkīden her haftada üçer bin ikişer yüz altmış beşer akçe vermek üzre yüz sekiz gün tamamına değin taksît edip ve zikr olunan bir sandık esbâbı izinleriyle bey‘ ettiğimde, semeni kırk beş bin akçeden ziyâde olursa deynlerine mahsûb olup noksan lâzım gelirse mezbûrûn Yahudiler tekmîle ta‘ahhüd eylediler dedikde, mukırr-ı merkūmu vech-i meşrûh üzre cârî olan cemî‘-i kelimâtını el-mukarrun lehümü’l-mezkûrûn bi’l-muvâcehe tasdîk ettikden sonra, berâ-yı muhâsebe zikr olunan bir sandık esbâbı füruhtuna bizden izin sâdır olmazsa meblağ-ı merkūm kırk beş bin akçe kezâlik def‘ ve edâsı lâzım deynimdir dediklerinde, zikr olunan medyûnların ta‘allül ve gaybet ederlerse meblağ-ı merkūmdan şer‘an zimmetine lâzım gelen akçeye Simon v. Mosi ve mezbûr Avraham’ın oğlu David nâm Yahudiler emr ve kabûlü hâviye kefâlet-i sahîha ile kefîl olup ve hîn-i talebde meclis-i şer‘a ihzârlarını iltizâm ettiklerinde, mâ vaka‘a ketb olundu. Fi’l-yevmi’l-hâmis ve’l-ışrîn min şehri Rebî‘ilevvel li sene seb‘a ve ışrîn ve elf. Şuhûdü’l-hâl: Mehmed Çavuş, Musli Çavuş, es-Seyyid Mehmed Çelebi, Ahmed b. Abdullah, Musa Bölükbaşı, Murad b. Mehmed, Mehmed b. Ahmed ve gayruhüm.