İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 152 Hüküm no: 163 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeni Gülahmer bt. Ovanes’in köle olmadığı Sâhibetü’l-kitâb çatık kaşlı elâ gözlü ak benizli orta boylu sol gözünde beni var Gülahmer nâm hâtun mahfil-i kazâda kendisine mülkiyyet zu‘mu ile vâzı‘atü’l-yed olan Emine Hâtun bt. Abdullah tarafından husûs-ı âtîye vekîl olup, vekâleti bi mâ hüve nehcü’s-sübût sâbite olan Ahmed Beşe b. Ali nâm râcil muvâcehesinde takrîr-i da‘vâ edip, ben mahrûse-i Erzurum’da Gürcükapısı kurbunda Ağca minâre mahallesinde Ovanes v. Manol nâm hurrü’l-aslın zevcesi Şahsultan nâm Ermeniyyeden mevlûde hurretü’l-aslım deyicek, mersûm istintâk olundukda, müvekkilem mezbûre Emine mersûme Gülahmer’i Ali Bey nâm kimesneden sekiz bin akçeye iştirâ edip inde’l-bey‘ ve’t-teslîm inkıyâd u itâ‘at edip hurretü’l-asl değildir deyû inkâr edip, Dârü’s-selâm’da asıl hürriyet olup ve kıyâs-ı beyyine müdde‘î rıkka lâzım iken mezbûre rıkka ikrâr etmekle, beyyine-i mezbûre Gülahmer’e lâzım gelip da‘vâ-yı hürriyetden tenâkus zarar vermemeğin mersûme Gülahmer’den da‘vâsına muvâfıka beyyine taleb olundukda, udûl-i Müslimînden mahalle-i mezbûreden Pîrî b. Üveys ve eş-Şeyh Emir b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka mezbûre Gülahmer mahalle-i mezbûreden Ovanes nâm hurrü’l-aslın zevcesi Şahsultan nâm hurretü’l-asldan mevlûde olmağla hurretü’l-asldır. Bu husûsa şâhidleriz şehâdet dahi ederiz deyû edâ-i şehâdet-i şer‘iyye edip, şehâdetleri ba‘de’t-ta‘dîl hayyiz-i kabûlde vâkı‘a oldukdan sonra merkūmenin hürriyetine hükm olunup, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’t-tâsi‘ ve’l-ışrîn min şehri Rebî‘ilevvel li sene seb‘a ve ışrîn ve elf. Şuhûdü’l-hâl: Mustafa Çavuş el-mübâşir, Piyâle b. Mustafa, Mustafa Beşe çukadâr, Murad b. Abdullah.