İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 152 Hüküm no: 164 Orijinal metin no: [17b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer Hâtun bt. Sinan’ın evini satmak üzre Mehmed Çelebi’yi vekil tayin ettiği Sâhibü’l-kitâb Mehmed Çelebi b. Mustafa nâm yesârîden meşhûdiyye-i âtî vech-i üzerine da‘vâ-yı sahîha ile mesbûk istişhâd-ı şer‘î sudûrundan sonra udûl-i müslimînden Mehmed b. Mehmed ve Ahmed b. Hasan el-müezzin nâm kimesneler li ecli’ş-şehâde meclis-i şer‘a hâzırân olup, hasm-ı şer‘î-i câhid mahzarında edâ-i şehâdet-i şer‘iyye edip, mahmiye-i İstanbul’da Debbâğzâde mahallesi sâkinelerinden Kamer Hâtun bt. Sinan müsteşhid-i mezbûru “a‘mal bi re’yike ve ef‘al mâ şi’te” mazmûnunu hâvî vekâlet-i mutlaka ile mahalle-i merkūmede vâki‘ ma‘lûmü’l-hudûd mülk menzilini bey‘ ve semenini kabza ve sâir umûruna vekîl ve menâbına nâ’ib nasb edip, ol dahi kabûl eyledi. Bu husûsa şâhidleriz şehâdet dahi ederiz dediklerinde, gıbbe’t-ta‘dîl şehâdetleri hayyiz-i kabûlde vâkı‘a olmağın, mâ hüve’l-vâki‘ bi’t-taleb ketb olundu. Tahrîren fî selhi şehri Rebî‘ilevvel li sene seb‘a ve ışrîn ve elf. Şuhûdü’l-hâl: Hüseyin Efendi b. Şaban, Ahmed b. Sinan, İbrahim b. Mustafa, Yusuf b. Abdullah, İbrahim b. Mustafa ve gayruhüm.