İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 153 Hüküm no: 165 Orijinal metin no: [17b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Hasan’ın eşyalarını alan Ayşe Hâtun anlaştığı Mahmiye-i İstanbul’da Kürkçübaşı mahallesi sükkânından Ahmed b. Hasan nâm kimesne meclis-i şer‘-i şerîfde, işbu sâhibetü’l-kitâb Ayşe bt. Ahmed nâm hâtun muvâcehesinde takrîr-i kelâm edip, târih-i kitâbdan mukaddem mezbûre Ayşe Hâtun Rûsiyyetü’l-asl Mülâyim nâm câriye-i memlûkemi ıdlâl edip, yine câriye-i mezbûre yediyle bin akçe kıymetli üç ayaklı bir altın küpe ve altı yüz akçe kıymetli bir gümüş kuşak ve iki bin akçe kıymetli alaca kaftan ve sekiz yüz akçe kıymetli sincabî bir tür kuşak ve sekiz yüz akçe kıymetli bir miskî atlas kaftan ve üçer yüz akçe kıymetli üç top keten bezi ve iki bin üç yüz akçe kıymetli bir gümüş kuşağımı mezbûre Ayşe ahz u kabz eylemişdir deyû da‘vâ eylediğimde, câriye-i merkūmeyi mezbûre Ayşe yedinden ahz edip, zikr olunan eşyâyı dahi taleb eylediğimde beynimizde münâza‘ât-ı şedîde vâkı‘a olmuş idi. El-hâletü hâzihî beynimize muslihûn tavassut edip husûs-ı mezbûru sekiz bin nakd-i râyic fi’l-vakt akçeye sulh eylediklerinde, ben dahi sulh-ı mezbûru kabûl ve bedeli olan meblağ-ı mezbûr sekiz bin akçeyi merkūme Ayşe yedinden bi’t-tamâm ahz u kabz eyledim. Zikr olunan eşyâya müte‘allik da‘vâ ve nizâ‘dan fâriğ olup [18a] eymân ve muhâsamâtdan mezbûre Ayşe Hâtun’un zimmetini ibrâ-i âm ile ibrâ ve ıskāt-ı tâm ile ıskāt eyledim. Ba‘de’l-yevm benden veya vekîlimden mazmûn-ı kitâba muhâlif da‘vâ sâdıre olursa lede’l-hükkâmi’l-kirâm mesmû‘a ve makbûle olmaya dedikde, müdde‘î-i mezbûrun vech-i meşrûh üzre ikrârın merkūme Ayşe Hâtun bi’l-muvâcehe tasdîk edicek, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâmin ve’l-ışrîn min şehri Rebî‘ilevvel li sene seb‘a ve ışrîn ve elf. Şuhûdü’l-hâl: İbrahim Çelebi b. Ferruh, İsa Bey b. Ahmed, Mustafa b. Hüseyin, Sâlih b. Abdullah, Mehmed b. Abdullah ve gayruhüm.