İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 154 Hüküm no: 168 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çâşnigir Ali Paşa’nın Kosta v. Yorgi’deki alacağını tahsil ettiği Eyâlet-i Urfa’dan munfasıl olan emîrü’l-ümerâ’i’l-kirâm sâhibü’l-izz ve’l-ihtişâm Çâşnigir Ali Paşa -edâmallâhu [te‘âlâ] iclâlehû- tarafından husûs-ı âti’z-zikri ikrâra Süleyman b. Hüseyin ve Süleyman b. Hasan şehâdetleri ile şer‘an vekâleti sâbite olan Hüseyin b. Hasan meclis-i şer‘-i şerîfde, işbu sâhibü’l-kitâb Kosta v. Yorgi nâm zimmî muvâcehesinde ikrâr ve ta‘bîr ani’l-merâm edip, cihet-i karzdan müvekkil-i müşârun-ileyhin merkūm Kosta zimmetinde yüz otuz bin fıdda akçe hakkı olup taleb eyledikde, zimmî-i mezbûr mahmiye-i İstanbul’da Fenerkapısı hâricinde Abdi Subaşı mahallesinde vâki‘ bir tarafı Ali Çelebi b. Karakaş ve bir tarafı Sürücü Yani mülkleri ile ve bir tarafı sâhil-i bahr ve bir tarafı tarîk-i âm ile mahdûd olup, büyût-ı müte‘addideyi hâvî olan bir bâb mülk menzilini ve hizâsında vâki‘ eşcâr-ı müsmire ve gayr-i müsmireyi muhtevîye olan mülk hadîkasını ba‘de’t-tahliyye meblağ-ı mezbûr mukābelesinde müvekkil-i mûmâ-ileyh katında rehin vaz‘ edip, onlar dahi irtihân ve kabz ettiklerinden sonra, meblağ-ı mezbûr yetmiş bin akçesini zimmî-i mersûm yedinden ahz u kabz edip, mâ‘adâsı olan elli bin akçe zimmetinde bâkī kalmışdı. El-hâletü hâzihî meblağ-ı bâkī bi’t-tamâm müvekkil-i mezbûr zimmî-i merkūm yedinden alıp kabz eyledikden sonra menzil-i mezbûr ve hadîka-i merkūmeden mersûm Kosta’ya teslîm edip fekk-i rehin eyledim. Min ba‘d meblağ-ı merkūm yüz otuz bin akçeden zimmî-i mersûm zimmetinde bir akçe ve bir habbe hakkım bâkī kalmadı dedi deyicek, vekîl-i mezbûru ikrâr-ı meşrûhunda mersûm Kosta vicâhen tasdîk edicek, mâ hüve’l-vâki‘ gıbbe’t-taleb ketb olundu. Tahrîren fî evâhiri evveli’r-rebî‘ayn li sene seb‘a ve ışrîn ve elfŞuhûdü’l-hâl: Mefharü’l-müderrisîni’l-kirâm Derviş Efendi b. Mehmed, es-Seyyid Mustafa Efendi, Ebûbekir Efendi el-Bursevî, el-Hâc Ali b. Abdullah Kethüdâ-yı muhzırîn, Mustafa b. Hamza, Mustafa b. Mehmed ve gayruhüm.