İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 155 Hüküm no: 169 Orijinal metin no: [18a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dramalı Ahmed b. Mehmed’in Hacı Mustafa ile alacaklı davasında sulh olduğu Rumeli’nde Drama Kazâsına tâbi‘ Suçan nâm karye sâkinlerinden Ahmed b. Mehmed nâm kimesne meclis-i şer‘-i şerîfde, işbu hâfızu’l-kitâb el-Hâc Mustafa b. Yusuf nâm râcil muvâcehesinde tâyi‘an ikrâr ve ta‘bîr ani’l-merâm edip, bundan akdem merkūm el-Hâc Mustafa yedinden bi gayri hakkın üç bin nakd-i râyic fi’l-vakt akçe ahz u kabz eyledi deyû taleb ve da‘vâ edip, beynimizde münâza‘ât-ı kesîre vâkı‘a olmuşdu. El-hâletü hâzihî beynimize Müslimûn-ı muslihûn tavassut edip husûs-ı mezbûru an inkâr bin akçeye sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr bin akçeyi mersûm el-Hâc Mustafa yedinden bi’t-tamâm ve’l-kemâl ahz u kabz eyleyip, zimmetini husûs-ı mezbûra müte‘allik olan cemî‘-i de‘âvî ve mütâlebât ve eymân ve muhâsamâtdan ibrâ-i âm ile ibrâ ve ıskāt eyledim dedikde, ba‘de’l-yevm mazmûn-ı kitâba muhâlif benden veya vekîlimden da‘vâ sâdır olursa lede’l-hükkâmi’l-kirâm mesmû‘a ve makbûle olmaya dedikde, mukırr-ı mezbûrun vech-i meşrûh üzre ikrârı merkūm el-Hâc Mustafa vicâhen tasdîk edicek, mâ hüve’l-vâki‘ gıbbe’t-taleb ketb olundu ve imlâ olunup yed-i tâlibine def‘ olundu. Tahrîren fî gurreti şehri Rebî‘ilevvel li sene seb‘a ve ışrîn ve elf. Şuhûdü’l-hâl: Mustafa Bölükbaşı b. Osman, Mahmud Çelebi b. İsmail er-râcil, Halil b. İbrahim ve gayruhüm.