İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 157 Hüküm no: 174 Orijinal metin no: [18b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâssa Koyun Sürücüsü Laskari’nin taahhüt edip ödemediği paranın kefîlden tahsili Hâssa sürücülerden sâhibü’l-kitâb Lori v. Yorgi nâm zimmî mahfil-i kazâda Laskari v. Mavrodi muvâcehesinde üzerine da‘vâ edip, bi’l-fi‘il koyun emîni olan Ahmed Ağa nâm kimesne Varna ve Umurfakih kazâlarından bin yirmi altı senesine mahsûb olmak üzre, her re’si otuz akçe hesâbı ile cem‘i fermân olunan üç bin altı yüz koyunun bahâların merkūm Laskari’ye der-uhde ettikde, zikr olunan koyunların hesâb-ı mezbûr üzre bahâları olan cem‘an yüz sekiz bin akçeye ben merkūm Laskari’nin emri ile kefîl olup, ba‘dehû mersûm Laskari hesâb-ı mezbûr üzre zikr[i] sebk eden koyunların bahâların tahsîl ve kabz edip teslîm etmemek ile emîn-i merkūm kefâletim hasebiyle meblağ-ı merkūm yüz sekiz bin akçeyi benden bi’t-tamâm ahz eylemişdir. Hâlâ ben dahi mezbûrdan taleb ederim dedikde, gıbbe’s-suâl merkūm Laskari cevâbında, fi’l-vâki‘ emîn-i mezbûr târih-i merkūmda zikr olunan koyunların hesâb-ı merkūm üzre bahâları cem‘ini bana der-uhde ettikde, mezbûr Lori bahâlarından şer‘an zimmetime lâzım gelen meblağ-ı merkūm yüz sekiz bin akçeye emrim ile kefîl olup, ben dahi zikr olunan kadılıklara varıp zikri sebk eden koyunların hesâb-ı mezbûr olan mîrîye âid olan bahâları ki cem‘an yüz sekiz bin akçe olup tahsîl ve kabz eyledim ve merkūm Lori kefâleti hasebiyle meblağ-ı merkūmu emîn-i merkūma teslîm eyleyip ol dahi kabz eylemişdir deyû ikrâr edicek, i‘tirâfı mûcebince meblağ-ı merkūmu tahsîl ve kabz etmeğe kefâlet-i mezbûre-i sahîha olmağın edâsına tenbîh olunup, mâ vaka‘a gıbbe’t-taleb ketb olundu. Tahrîr fî selh-i şehri Rebî‘ilevvel li sene seb‘a ve ışrîn ve elf. Şuhûdü’l-hâl: Murad b. Mehmed, Mustafa Beşe ed-Defterî, Hüseyin b. Ali ve gayruhüm.