İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 162 Hüküm no: 184 Orijinal metin no: [19b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Hüseyin’in yangından kurtarması için Mehmed b. Receb’e verdiği eşya davasının reddedilmesi Mahmiye-i İstanbul’da Hoca Hayreddin mahallesi sâkinlerinden el-Hâc Mehmed b. Hüseyin meclis-i şer‘de Mehmed b. el-Hâ[c] Receb mahzarında üzerine da‘vâ edip, târih-i kitâbdan beş gün mukaddem mahmiye-i mezbûrede gece ile hark vâki‘ oldukda, sâkin olduğum menzilimden taşra çıkar deyû, merkūm Mehmed’e bir çuval içinde beş yüz akçe kıymetli bir sîm devât, dört bin akçe kıymetli bir çift altın bilezik, bin akçe kıymetli bir çift altın küpe, iki bin akçe kıymetli bir altın, bir mor dolama, sekiz yüz akçe kıymetli on sekiz makrama ve iki yüz akçe kıymetli bir dülbent teslîm edip, merkūm dahi yedimden ahz u kabz eylemiş idi. Hâlâ eşyâ-yı mezbûru merkūmdan taleb ederim dedikde, gıbbe’s-suâl merkūm Mehmed cevâbında, fi’l-vâki‘ hark vâki‘ olduğu gece mezbûr el-Hâc Mehmed yedinden içinde ne idiği ma‘lûm değil bir çuval menzilden taşra çıkarmak için alıp taşra çıkdığımda üzerime eşkiyâ müstevlî olup çuvalı cebren yedimden aldılar dedikde, merkūm Mehmed’in yedi yed-i emânet olup yemînle musaddak olmağın, makbûzu olan eşyâyı mezbûreye bi vechin mine’l-vücûh te‘addî etmediğine yemîn teklîf olundukda, alâ vefk-i musûle? yemîn billâhi’l-aliyyi’l-azîm etmeğin, merkūm el-Hâc Mehmed mu‘ârazadan men‘ olunup, mâ vaka‘a bi’t-taleb ketb olundu. Hurrire fi’l-yevmi’l-âşer min şehri Rebî‘ilâhir sene seb‘a ve ışrîn ve elf. Şuhûdü’l-hâl: Murad b. Mehmed, Himmet b. Mustafa, Mehmed b. Cafer ve gayruhüm.