İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 163 Hüküm no: 185 Orijinal metin no: [19b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Piyâle b. Abdullah’ın Sarrâc İshak mahallesindeki evini istiğlal yoluyla Hacı Mustafa vakfına sattığı ve ev için kira borcunu vermediği Mahmiye-i İstanbul’da vâki‘ el-Hâc Mustafa vakfına bi’l-fi‘il mütevellî olan râfi‘ü’l-kitâb Ali b. Abdullah meclis-i şer‘de Piyâle b. Abdullah mahzarında üzerine da‘vâ edip, merkūm Piyâle mahmiye-i merkūmede Sarrâc İshak mahallesinde vâki‘ bir tarafı Mehmed b. Çavuş b. Rıdvan mülkü ve bir tarafı ( ) vakıfı ile ve tarafeyni tarîk-i âm ile mahdûd olan mülk menzilini vakf-ı merkūm malıyla istiğlâl tarîkiyle yüz otuz bin beş yüz akçeye bin yirmi beş senesi Şevvâli’nin onuncu gününden bey‘ edip, ba‘dehû sene tamamına değin on üç bin elli akçeye istîcâr edip, minvâl-i meşrûh üzre târih-i merkūmda mahmiye-i merkūmede vâki‘ Mahmud Paşa Mahkemesi’nde nâ’ibü’ş-şer‘ olan Ahmed Efendi b. Alâaddin huzûrunda hüccet-i şer‘iyye olunmuş iken, hâlâ mersûm Piyâle menzil-i merkūmun icâresini vermekde ta‘allül eder suâl olunmak murâd ederim deyip, mevlânâ-yı mezbûr imzâsıyla ve mümzât ve hâtemi ile mahtûm târih-i merkūm ile müverraha takrîrine muvâfık hüccet-i şer‘iyye ibrâz edip, merkūm Piyâle’nin muvâcehesinde kırâ’at olundukda, mazmûn-ı hücceti münkir olıcak, mütevellî-i merkūmdan mazmûnuna mutâbık beyyine taleb olundukda, udûl-i ricâlden olup zeyl-i hüccetde mastûrü’l-esâmi olan Müslimînden Sâlih Efendi b. Bayram el-imâm ve İsa Halife b. Dede el-müezzin nâm kimesneler meclis-i şer‘a hâzırân olduklarında gıbbe’l-istişhâd, fi’l-vâki‘ merkūm Piyâle’nin menzil-i mahdûd-ı mezkûru vakf-ı merkūma târih-i mezbûrda yüz otuz bin beş yüz akçeye istiğlâl tarîkiyle bey‘ edip, bir sene tamamına değin on üç bin elli akçeye istîcâr ve kabz eyleyip nâ’ib-i mûmâ-ileyh huzûrunda hüccet olunmuşdur. Hüccet-i merkūmenin mazmûnuna şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, ba‘de ri‘âyet-i şerâ’iti’l-kabûl şehâdetleri hayyiz-i kabûlde vâkı‘a oldukdan sonra mûcebiyle hükm olunup, mâ vaka‘a gıbbe’t-taleb ketb olundu. Tahrîren fi’l-yevmi’s-sânî min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Musa b. İlyas, el-Hâc Ali b. Abdullah, Fahrü’l-âşiyân Ömer Çavuş, Mehmed Çelebi b. Abdullah ve gayruhüm.